ORANJESTAD, 02 januari 2021. Segun resumen di awe 30 persona a recupera, a registra un total di 23 caso nobo di Covid-19, di cual 16 ta residente y 5 no residente, cantidad total di testnan ehecuta ayera na e diferente localidadnan entre otro laboratorio di hospital, laboratorionan priva y aeropuerto ta 353 test, ‘positivity rate’ local riba dia di ayera ta 46%).
Activo tin awe 274 caso, cantidad di fayecido relaciona cu Covid-19 ta keda igual, 49.
Hospital ta informa cu tin un total di 10 persona interna di cual 3 ta den Cuido Intensivo y 7 riba unidad general di covid.
Den e siman cu a transcuri por a tuma nota cu e casonan positivo y e ‘positivity rate’ ta aumentando den un forma stabil. Esaki ta indica cu plamamento di e virus ta tumando luga riba base regular y no ta descarta cu mirando e cantidad di fiestanan, aglomeracion y celebracion cu a tuma lugar den e dianan cu a pasa Aruba lo por bay mira un aumento drastico den cantidad di casonan.
E recomendacion pa stop e plamamento di e virus ta keda igual. Si bo tin sintoma evita contacto cu tur persona y tuma contacto cu bo dokter di cas pa por haci un test. Evita espacionan y lugarnan cu tin hopi persona (aglomeracion). Mantene distancia di 1.5 meter di distancia di otro persona y den tur espacio interior uza tapa boca. Mantene un bon higiena di man labando esaki regularmento of uza handsanitizer.
Un persona por tin e virus y por ta plamando esaki sin cu e mes tin sintoma ainda of porta su sintomanan ta hopi leve. Esaki te motibo pakiko bo tin pa proteha bo mes y alavez proteha otro persona na tur instante.