Home Local Bonbini na nos dushi Baby di Aña 2021: Énileigh Xiandra Viaña...

Bonbini na nos dushi Baby di Aña 2021: Énileigh Xiandra Viaña Lora

SHARE

Dr. Horacio E. Oduber Hospital tabata di fiesta diabierna, dia 1 di januari 2021, pa celebra e nacemento di Baby di Aña 2021. Ta un tradicion cu prensa y diferente instancia ta pendiente dia prome pa e prome nacemento di aña. E ana aki tabata poco diferente mirando  e regalanan di Covid-19 na Hospital  y no por a permiti miembronan di prensa conoce e baby y comparti esaki cu Aruba completo. Pero Hospital no por a laga e momento grandi aki di tur aña pasa y mes a cubri e momentonan aki y ta comparti esaki cu tur hende. For di momento cu 12’or di anochi a bati, tur personal di departamento di Maternidad tabata pendiente pero ningun mama a drenta Hospital te cu atardi laat riba 1 di januari 2021. Pa 7or y 6 minuut di anochi a yama bon bini na baby di aña Énileigh Viaña Lora.

Cu alegria , Mami Evelin Geerman y Papi Xander Viaña Lora a carga nan baby pa prome biaha y a yame Énileigh Xiandra. Baby Énileigh a nace cu 31 siman, pisando 1680 gram y tin un largura di 42 cm. Un baby cu a nace prematuro pero di bon salud. Hopi pabien na e mayornan cu ta super alegre y emociona. 

Mami a wordo asisti pa Ginecologo Moreta y no por lubida e team dinamico di Departamento di Maternidad cu a duna e guia necesario durante y despues di e parto. Awo baby Énileigh ta den couveuse riba departamento di mucha pa asina e crece fuerte y por bay cas cu su mami y papi. 

 

Riba 2 di januari pa 5.53 di mainta a nace di dos baby di aña 2021 cu ta baby Shaqzionne Kayson Solognier. Pabien ta bay pa Mami Kaythleen Semerel y papi Shaquille Solognier cu ta super orguyoso y contento cu nan baby mucha homber . Un baby cu a nace 49 cm largo y ta pisa 3350 gram. Partera Daal a guia e parti prome cu e parto y e ginecologo Ginecologo Moreta a haci e operacion asisti pa e tremendo di OK di HOH. Y e tremendo team di Maternidad a brinda e guia necesario pa tur cos cana bon pa mami y baby. 

 

Danki ta na bay na Bling Balloons cu e bunita areglo di ballon pe prome baby di aña. Tambe di curason danki na Huggies cu a haci donacion di 4 pakete pa e ultimo dos babynan di 2020 y pa e prome dos babynan di 2021. Por ultimo danki ta bay na Johnson & Johnson pe bunita pakete regalo pa e baby di aña. 

 


Bon aña 2021 Aruba completo y ban cuida y keda safe!