Home Politics Prome Minister Evelyn Wever-Croes: MEDIDANAN NOBO ENTRANTE DIARANSON 30 DI DECEMBER...

Prome Minister Evelyn Wever-Croes: MEDIDANAN NOBO ENTRANTE DIARANSON 30 DI DECEMBER TE CU DIADOMINGO 3 DI JANUARI

SHARE

 

 

 

Durante rueda di prensa di Gobierno di Aruba y Crisis Team, Prome Minister Evelyn Wever-Croes a anuncia e medidanan nobo pa frena contagio di Covid cu ta drenta na vigor diaranson 30 di december. 

 

Comercio 

Orario di ciere ta bira 10or pm pa tur establecimento, excepcion di hotelnan. Pa loke ta animacion musical esaki ta posiblel solamente den establecimentonan. Por ehempel restaurant, conforme reglanan y protocol y sin bailamento. Ta enfatisa cu e musiconan y restaurant ta responsabel pa tur hende atene nan mes na reglanan. Musica pafo no ta wordo permiti. 

Pa locual ta e tradicion di tira pagara, ta permiti esaki te cu maximo 3or di atardi dia 31 di december. Pues despues di 3or di atardi riba e ultimo dia di aña, no ta permiti pa comercio tira pagara mas y esaki ta pa evita mas aglomeracion. 

“E problema no ta e pagara, e problema ta e paranda cu ta nos tradicion rond di e pagara, cual no por permiti pa tuma luga e aña aki pa evita mas aglomeracion. Na cas si por, te despues di tiro, pasobra no tin mesun riesgo di aglomeracion”, Premier Wever-Croes a splica.

General

Ta introduci tambe toque de queda entrante 30 di december te 3 di januari cuminsanda for di 11.00 pm te cu 5.00 am, cu excepcion di dia di tiro 31 december pa 1 di januari. E dia aki e toque de queda  ta cuminsa 2or di marduga permitiendo un y tur pa toch por pasa tiro sea na famia of tirando pagara riba caya. Orario di ciere ta keda 10or pa dia 31 di december tambe.

 

Apart di esaki tin algun recomendacion

Pa loke ta cantidad di persona na cas, nos ta sugeri pa limita e cantidad cu ta ricibi di bishita. Si ta paden ta maximo 10 hende si tin espacio pa sinta cu un distancia di 1.5 meter for di otro y si ta pafo den cura maximo 25 hende. Polis por actua contra incumplimento di esaki, ora ta necesario.

Nos tradicion di Dande ta un riesgo considerando cu hende ta pasa di cas pa cas y di e forma aki ta piki e virus y hib’e pa e siguiente cas, cu talves tin lunanan ta cuida. 

“Nos ta recomenda pa no haci esaki e aña aki pasobra e ta un riesgo mas halto pa contagio y enbes di trece e bendicion e por trece e maldicion di e virus. Nos por pidi nos radionan pa toca Dande ora di tiro y asina toch nos tur por gosa di un Dande”.

 

Recordatorio riba e siguiente reglanan:

Doño di establecimento ta responsabel pa loke ta pasa paden y pafo. Restaurant: Paden mester atene na e cantidad maximo, 8 mesa paden y 10 mesa si ta den aire liber y clientenan mester ta sinta. Pafo: no por permiti mas di 5 hende ta warda riba nan turno y nan mester tene distancia.

Cada establecimento mester tin su propio Compliance Officer cu ta controla y observa cu e reglanan ta wordo cumpli. Taskforce y Polis lo eherce mas control y si constata cu un establecimento no ta cumpli, por tuma e medida di cera e establecimento pa algun dia te ora Taskforce determina cu e establecimento ta cumpli cabalmente. Esaki lo NO ta e mesun dia. Tambe lo impone e multanan como sanccion. Esakinan ta publica riba website di Gobierno, y ta conoci caba.

Pa conclui Prome Minister a bisa: “Ta institui e medidanan aki pa frena e desaroyo di contagio di e virus. Pasobra no kier mira un otro ola di contagio sin cu a tuma paso na tempo. E fin di aña aki nos mester haci sarificionan hunto un biaha mas pa asina nos por proteha nos comunidad, famia y nos mes. Principalmente pa habri aña 2021 cu optimismo, oportunidad di recuperacion y progreso”.