Buena Vista – Dialuna atardi pa mas o menos 4’or polis a bay den e bocht di Buena Vista unda cu auto lo a dal un persona.
Na yegada polis di trafico a bin compronde cu auto no a dal ningun persona.
A bin resulta cu tawata trata di un caso di maltrato, e victima tabata e conocido Preke.
Tras di stuur tawata tin un otro persona conoci di Husticia.
Na banda di caminda tawata tin un pick up blanco staciona. Algun persona cu tabata testigo clave tawata den nan auto y birando den e bocht nan a tuma nota di e maltrato pisa memey di caminda.
Segun e testigonan, e agressor Patricio T. kende tawata e chauffeur tawata dal/bati Preke manera cu e tawata un popchi paña, e tawata hise bente abou.
Preke kende ta un persona hopi delega lo a haya basta golpi y tawata tin un kap serio na cabes.
Esaki a bira motibo suficiente pa detene Patricio pa maltrato pisa.
Den baki di e pick up tawata tin un boter di e bebida Night Train y tambe na banda di caminda un otro boter di Night Train poni abou.
Loke por a pasa ta cu durante cu Patricio tawata hibando Preke su cas, un problema a start den auto y debi cu ambos tawata bou influencia Patricio a dicidi di para e auto banda di caminda y asina a cuminsa maltrata Preke.
Ambulance a yega hopi lihe na e sitio y pa algun minuut a cera e caminda pa asina e Paramediconan por a atende Preke y despues pone riba brandcard y transporte pa Hospital.
Mientrastanto e polisnan na e sitio a detene Patricio pa maltrato y a pidi pa transportwagen di Santa Cruz, cu a transporta Patricio pa warda di polis na Santa Cruz, unda e lo mester presenta dilanti un Sub Fiscal, kende lo determina kiko lo bay pasa cu Patricio su libertad.
