Home Local Bispo di Pasco anochi… Un concierto regalo pa henter nos pueblo!

Bispo di Pasco anochi… Un concierto regalo pa henter nos pueblo!

SHARE



Dia 24 di december pa 9’or di anochi, Edjean Semeleer lo regala henter nos comunidad su proyecto musical di mas nobo: “Fin di aña na cas”. Un recital musical Navideño pa engrandece nos celebracion di fin di aña. Esaki lo ta un estreno nacional y historico cu lo ta den cadena.

E concierto aki lo por wordo disfruta via canalnan local di television manera TeleAruba canal 13, Nos Isla TV canal 23, Canal 22 y DiarioTV canal 48. 

 

Usuarionan di e plataforma digital lo por disfruta di esaki tambe via Facebook Live riba paginanan: Edjean Semeleer, Go Cultura Foundation, Na Drempel di Fin di Aña, Teamfilms Aruba, Power Fm y mas.

E concierto aki sigur lo aporta na haci e dianan aki sinti aun mas special, considerando e aña desafiante tras di lomba. 

 

Un elenco impresionante di musico y artista a bini hunto pa presenta e serenata Navideño aki y asina haci e esfuerzo di alegra alma y curazon di tur esnan cu lo ta sinta den e calor y siguridad di nan propio hogar.
Bo ta invita pa bisti di gala den bo mesun hogar cu bo sernan keri y disfruta di un concierto magico yena di alegria, positivismo y talento excepcional.

Edjean Semeleer, hunto cu su elenco di musico y artista ta invita bo pa disfruta di “Fin di aña na 

cas”.

Compania y organisacionnan local Aruba Bank, New India Assurance, UNOCA, Prins Bernhard Cultuurfonds, Fundacion Go Cultura, Trash by Ronchi, Superfood Plaza, Setar NV, Universal Technologies Aruba, Subway, Dshop y Super DoIt Center a expresa nan orguyo y satisfaccion di a brinda sosten y apoyo na e iniciativa sumamente special aki cu lo bira otro produccion di un nivel excelente, presenta pa nos propio hendenan.