Durante conferencia di prensa di Gobierno di Aruba dialuna mainta, Prome Minister Evelyn Wever-Croes a elabora riba e obhetivonan strategico di e-Government Road Map. Esaki ta basa riba 10 obhetivo strategico cu lo catalisa transformacion digital di Aruba – mayoria ya caba ta den fase di implementacion:
- Crea un sistema di e-government integral – locual nos ta yama interoperability platform
- Introduci un identificacion nacional digital
- Crea un cuadro di ley y regulacion
- Simplifica y digitalisa servicionan clave di Gobierno
- Sigura privacidad di data y un modelo robusto di cybersecurity
- Inverti den preparacion y educacion digital di empleado publico y ciudadanonan
- Diseña un campaña di conscientisacion pa sigura inclusion completo di henter nos comunidad
- Institui un structura di coordinacion di e-government
- Prepara un modelo financiero sostenibel y un modelo di procurement transparente
- Crea un ecosistema activo pa acelera digitalisacion na Aruba den tur sector
Durante conferencia di prensa, Prome Minister a duna di conoce cu e lo keda duna update durante e trayecto y stakeholders nan tambe por spera invitacion den 2021 pa nan tambe por forma parti di e fase di implementacion. E prome proyecto cardinal di e e-Government road map ya caba a drenta fase di implementacion, cual ta e asina yama interoperability platform, Conexion, cu ta e creacion di e plataforma digital pa intercambia datos den gobierno na un forma sigur. E proyecto aki tin un termino di 5 luna y na final di e fase aki comunidad lo mira un aceleracion pa locual ta trata introduccion di mas servicio digital di gobierno.
Tur informacion di e road map lo ta obtenibel online den januari 2021. Mientrastanto, esnan cu ta desea di lesa e road map, por manda un email pa [email protected].