Home History of Aruba Historia di Aruba: Explosion di un projectil den un cas den Herman...

Historia di Aruba: Explosion di un projectil den un cas den Herman Gorterstraat, a costa bida di un hobencito di 12 aña

SHARE

Historia di Aruba, e sucedido tragico aki a pasa 52 aña pasa y te awe tin varios di nos grandinan cu ta corda e sucedido aki cu a keda graba den nan memoria.

Hendenan grandi cu tabata biba den area entre Klip y Mon Plaisir, te awe ainda ta corda e susto cu nan a pasa e diahuebs merdia aki di aña 1968. Un mucha homber di apenas 12 aña inocentemente a perde su bida y a causa un tristeza no solamente pa su famia, pero pa henter Aruba.

Herman Gorterstraat, Oranjestad: Aña 1968, diahuebs 11 di April, den careda di 1’or di merdia habitantenan di Herman Gorterstraat y vecindario a scucha un explosion masha duro mes.

E habitantenan a haya un susto di nan bida. Mesora varios di nan a core sali pafo y a nota cu huma tabata sali for di un cas, cas di famia Gottfried y tambe a nota cu un parti di e dak di cas a cay aden. Hopi lihe nan a bin compronde cu algo a explota den e cas.

Un diahuebs merdia cu tabata mustra di tabata un merdia trankilo na Aruba, a cambia den un pesadia y tristeza no solamente pa dos famia pero pa henter e comunidad di Aruba. 

Cinco mucha hungando den un camber 
Na cas di e comerciante Ischo Gottfried, kende tabata un persona hopi conoci e tempo ey den comunidad. E comerciante tabata tin tres yiu y e dia aki dos primo di su yiunan a bin pasa algun dia cercanan, pa motibo cu nan mayornan a bay algun dia Miami. E muchanan manera tur otro primo cu topa nan ta hunga y ta hopi contento.

E explosion fuerte ta laga un mucha seriamente herida
Na dado momento un di e primonan, Steven Hirschberg di 12 aña a coy un granaat y a lag’e cay den un camber y esaki a explota. E explosion tabata asina fuerte cu Steven a keda seriamente herida, su situacion tabata hopi serio, su dos pianan tabata completamente cubri cu sanger. E la wordo transporta cu hopi urgencia pa San Pedro Hospital y mesora e mester a drenta den camber di operacion.

San Pedro Hospital 1968

E camber a keda completamente destrui
E cuater otro muchanan no a resulta herida pa motibo cu net na momento di e explosion nan no tabata den e camber, pero si nan a keda hopi trauma di e susto cu nan a pasa aden. E daño na e cas tabata grandi, mucho no a resta di e camber unda e explosion a tuma luga, e camanan a pega candela, pero bisiñanan mesora a actua y a saca e camanan bentanan pafo di e cas, un parti di e dak di e cas a cay den otro.

Mayornan a regresa di Miami
Mayornan di Steven mesora a wordo poni na altura y e intencion tabata pa manda e hobencito su siguiente dia pa Miami pa un tratamento medico mas avansa, pero lastimamente e heridanan tabata demasiado pa e hobencito. Diabierna den careda di 7’or y mey di mainta Steven Hirschberg a fayece. E tabata un golpi hopi duro pa henter e famia y muy especialmente pa su mayornanan cu mester a regresa Aruba pa bin dera nan yiu stima. Locual a sosode dia 11 di April 1968 a sacudi henter e comunidad di Aruba.

Masha hopi hende na e cas
Varios persona prominente di e tempo ey, despues di e sucedido a yega na e cas pa duna e famianan sosten den nan tristeza. Entre otro e Gezaghebber di e tempo ey Sr. Oscar Henriquez, Official di Husticia Sr. S.H. Tjong A Jong, comisario G.H. Mol, inspector H.D. van der Griendt, tambe Mayoor di Mariniers H.D. van Maren. Varios experto di Marina Real tambe a presenta na e cas pa cuminsa cu un investigacion, pa asina haya sa ta di cua projectil e tabata trata. Tambe e noticia a core hopi lihe y masha hopi mirones, famia y conocirnan a yega na e cas pa pone nan mes na altura di loke a sosode.

“Por papia tambe di poco suerte”
Segun e expertonan e projectil aki tabata uno cu tabata wordo uza pa tira via un arma di candela, estilo rifle. E tabata wordo uza vooral pa tira riba vehiculonan. E projectil tabata consisti di un metal hopi fini. Probablemente e hobencito aki a lag’e cay riba su nanishi, mirando e buraco grandi cu e la ocasiona den e vloer. E explosion fuerte, a kibra un cama completamente y tambe e dak di cas un parti a bin abou, pa e motibo aki, segun e expertonan na e sitio, “por papia tambe di poco suerte, paso e por tabata hopi mas pio, pero door cu e presion di aire a haya un salida via di e dak, e daño tabata menos”.

Proyectil haya den duinen na Westpunt
E muchanan e aña anterior durante un trip den e duinennan na Westpunt a bin topa cu e projectil aki, e mayornan a kere cu ta trata di un projectil cu lo a wordo tira caba y a keda benta den duinen. E mayornan a permiti e muchanan pa bay cu ne cas y warde como un souvenier, sin sa cu e projectil no a wordo tira y cu ainda e tabata un arma mortal, te na momento cu e mucha a lag’e cay y a explota causando morto di e hobencito y destruccion na e cas.

Entiero di Steven Hirschberg
Dialuna riba Pasco di Resureccion, Steven di 12 aña a wordo hiba na su ultimo luga di sosiego. Un entiero cu a sali for di Hospital, un cortejo funebre hopi grandi a hiba Steven Hirschberg na e santana Hudiu den Boerhavenstraat (actualmente caya Ernesto Petronia). Por a nota cu na momento cu cortejo funebre tabata pasando den cayanan di Oranjestad, un tristeza grandi tabata reina no solamente riba cara di esnan den e cortejo funebre, pero tambe riba di esnan para canto di caminda.

Su ultimo luga di sosiego
Varios persona prominente den nos comunidad di e tempo ey a acompaña e famia pa hiba nan ser keri na su ultimo luga di sosiego.  Por a mira entre otro Gezaghebber di e tempo ey, Oscar Henriquez, Deputado C. Lacle, miembro di staten di antiyas C. Yarzagaray, miembronan di staten di Aruba, G.A. Oduber y H.R. Dennert, tambe e personal completo di Casa Haime, varios miembro di e comunidad Hudiu di Aruba y Corsou, alumnonan di Juliana school, e scol cu Steven tabata bishita. E tabata un alumno hopi inteligente y tabata den zevende klas.
E la bay dera den un caha di palo blanco y como tradicion Hudiu, no ta carga flor.  Na su graf señor. Wisniewicz di e comunidad Hudiu na Aruba a tene e ultimo oracion.

Nos no tabata sa e historia tristo aki di Aruba, un meneer di edad cu tabata bon conoci di Ischo Gottfried a contanos locual a pasa cu e sobrino y na su honor nos ta dedica e historia. Poco poco nos ta keda haya sa mas di tragedianan, sucedidonan etc. cu antes a yega di sacudi henter comunidad di Aruba.

Si bo persona sa mas di e historia aki, of sa un otro y lo ta desea di papia over di dje, tuma contact cu nos via info@arubanative.com .