Home Politics Booshi Wever: PRESENCIA CONTINUO DI OTMAR DEN E GABINETE POREDmep NO...

Booshi Wever: PRESENCIA CONTINUO DI OTMAR DEN E GABINETE POREDmep NO TA UN STORIA PERO UN REALIDAD SUNU!

SHARE

Nos por a tuma nota den prensa cu recientemente tabata tin combersacionnan cu Secretario di Estado Knops, unda cu gobierno di Aruba a cuminsa duna contenido real na entregamento di nos autonomia na Hulanda, a base di e acuerdo traicionero cu Minister Presidente sra. Croes a firma riba e Black Friday 13 di november 2020. E “ENTREGUISTA” ta cumpli al pie de la letra cu tur exigencia Hulandes y recientemente a hasta broma cu e gran logro di un “liaison officer” entre gobierno, lesa Prome Ministro sra. Croes y COHO.

 

Riba su mes e ta un berguensa nacional caba cu entrega di nos autonomia a cuminsa haya forma oficial y definitivo. UPP en todo caso lo a desea di waak e ora nombracion di un persona cu hopi experencia, cu ta refleha integridad, mas neutral cu por carga confianza di henter nos comunidad y cu nos sa por deal cu e mosqueteronan Hulandes y ta dispuesto pa defende e interes di nos pais cu alma y cuerpo. 

Cu gran asombro y indignacion nos por atrobe comproba cu de facto e “mannan diabolico” di Otmar t’ey manera un clabo den e gobernacion actual. Dicon UPP ta bisa esaki? E persona apunta den e funcion di “liaison officer” ta carece di experencia y pio ainda tabata confidente y consehero principal di ex-minister Otmar Oduber desde cu esaki tabata minister pa AVP. 

 

Kico e confidente lo haci ora COHO wordo confronta cu TUR e asuntonan pa cual e ex ministro Otmar Oduber ta wordo acusa di dje? E persona cu tabata e “man drechi” di O.O. lo bay permiti sin mas pa investigacionan contra O.O. tuma lugar sin cu elo incrimina su mes of sconde documentonan?

E persona cu a wordo apunta como “liaison officer” na momento di retiro di ex minister Oduber a bay traha como consehero principal di Prome Minister, mescos cu varios otronan cu a bay traha sea pa Prome Minister of otro ministernan di MEP. Cu e nombracion aki nos por mira cu e influencia y presencia di Otmar ta grandi y a keda bibo den e gobierno POREDmep y hasta nos ta tribi di bisa cu ta mustra cu e influencia aki ta hopi bisto den partido MEP tambe. E “liaison officer” aki tabata e man drechi principal di Otmar tanto tempo esaki tabata Minister den e gobierno AVPOR y despues tambe como Minister di POR. Nos tur sa di e acusacionnan serio (7) cu tin contra e ex- Minister aki y e pregunta ta kico tabata e rol di e señora aki den tur e hazañanan y corupcionnan, patronahe politico, abuso di poder, labamento di placa cu e ex minister Otmar Oduber ta wordo acusa di dje? A caso e persona aki no a forma parti di e maniobranan coruptivo di ex-minister aki y lo no a coopera cu minister aki tambe?

 

Tabata hopi bisto cu e persona aki tabata actua bou Otmar manera cu e mes tabata Minister. Asina nos por comprende cu p.e. den e aventura di Serlimar e tabata e persona cu tabata dirigi e ex director di Serlimar tempo di Otmar. Lo no straña nos cu e nombracion di e ex-director aki a sosode riba e presion di e persona aki. P’esey ta interesante pa sa di e ex-director cu, segun UPP, ta “handlanger” di O.O. den e.o. e corrupcion di e incenirator chikito, kico e rol di e señora aki tabata den e caso aki y probablemente den e otro casonan cu a hiba Serlimar den e situacion cu e compania estatal aki ta actualmente. Ta riba su instruccion e ex-director di Serlimar tabata actua? Kico su rol ta den e otro departamentonan cu tabata resorta bow di O.O?

Pa colmo pa ta sigur cu lo hasi e “cover-up” completo, ta wordo bisá cu na januari 2021 sr. Andin Bikker lo asumi e responsabilidad di minister encarga cu Infrastructura y Medio Ambiente. Pues e señora aki den COHO lo por percura pa no tur documento wak luz di dia y sr. Bikker lo completa e obra di “cover-up”!!

 

Pues UPP ta constata cu e presencia di e persona aki den COHO ta muestra cu de facto ta O.O ta e “liaison officer” di Aruba. Hopi ta haci nan mes e pregunta con por ta posibel cu O.O di ta e corupto mas grandi cu historia di Aruba a conoce, a para bira esun cu ta dirigi e gobierno POREDmep y ta mustra cu su influencia ta bay mas leeuw cu hende por pensa. Di unda y dicon tanto poder asina? E no mester ta un sorpresa mas pa pueblo e papel cu Otmar ta hunga den e gobierno ainda. Un gobierno cu den su hamber pa poder no tin ningun tipo di problema pa ta complice den e accionan coruptivo di Otmar. P’esey si enberdad Aruba kier “get rid” di e tipo di gobernacion asina, mester bin un cambio total na unda no tin lugar pa tipo di elementonan asina ey den nos gobernacion. UPP ta ofrece e REBOOT 2.0 na unda lo percura pa un “MANECE NOBO PA ARUBA” na unda lo elimina mal gobernacion y corupcion.

 

Lider di UPP

Booshi Wever

20 december 2020