Home Politics ROSALINDA BOEKHOUDT (CURPA): “MI NO LO TA ACTIVO MAS DEN POLITICA”

ROSALINDA BOEKHOUDT (CURPA): “MI NO LO TA ACTIVO MAS DEN POLITICA”

SHARE

 

Kere of no politica na Aruba tin su beneficionan. E ta tuma hopi energia si y hopi pasenshi. Pero si bo guste di berdad e ta satisfactorio y fascinante. Den tur situacion, cu of sin voto/likes/tur emoji y sin recompensacion. Y e sentido di humor di nos hendenan den e discusionan riba social media sigur ta di aprecia. Por ehempel ora un persona a sugeri ariba social media cu e derecho riba e libertad di expresion ta depende di cantidad di voto. Naturalmente no ta asina pero mi a hañe gracioso pasobra si tawata berdad e persona mes no lo tawatin derecho di duna su opinion cu 0 voto.
Y cual semper mi a gusta tambe ta e bon maneranan, algo tipico di Aruba cu ta wordu practica ainda door di e mayoria di hende na Aruba.

Sinembargo ora nos a desea otro un Bon Aña Nobo na final di 2019 mi no ta kere cu niun di nos por a pensa cu 2020 lo trece un pandemia mundial yama COVID19 cu ne. Cu tur su consequencianan rond di mundo. Cu perdida di bidanan precioso. Cu perdida economico y financiero. Y cu tur e cambionan den e manera cu nos ta biba, socializa, cumpra cos, biaha y traha.
Pero hasta foi e malo por sali algo bon y asina hasta un crisis tin su bon tambe den e sentido cu e ta forza nos di pensa y cambia e perspectiva den nos bida.
Den mi caso e cambio di perspectiva e aña ki a conduci na e desicion pa sali foi politica.

Tempo perdi sigur e no tawata. Tur politico por haña hopi voto door di primiti votadornan favornan personal. Esey tur hende por. Especialmente si bo ta un candidato politico riba un partido tradicional. Pero purba conbence hende ariba un partido nobo anto sin un crisis manera COVID19 ta un esfuerzo y sacrificio grandi cu mayoria ni lo cuminsa cu ne. Pero esey ta cual mi a haci door di trece e programa y vision di nos partido pa dilanti. Mi a corre un campaña limpi. Dus ami ta satisfecho.
Banda di esaki mi a siña hopi foi politica na Aruba cual por ta util den otro areanan tambe. Y e tawata un placer pa por traha den un partido. Pues un danki di curazon na tur miembro di directiva y tur candidato di partido CURPA pa e ensenañza y cariño recibi.
Mi mejor deseonan pa exito y sabiduria pa e futuro.

Un danki tambe na tur e editornan di tur media di prensa cu a publica e articulonan politico.

Cada voto y cada florin contribui ta conta y ta un sosten pues danki tambe na e votadornan y contribuidornan y na tur cu a reacciona, sea di acuerdo of no. Contento cu nos por a agree to disagree. No problem y no ofense taken.

Take care y Cuida Curpa!