Home Politics Minister Andin Bikker: Lo bay construi un edificio mas amplio pa Cuerpo...

Minister Andin Bikker: Lo bay construi un edificio mas amplio pa Cuerpo Policial y Migracion Aruba na waf di Barcadera

SHARE

Recientemente minister mr. Andin Bikker a bishita e edificio existente di Cuerpo Policial y Migracion Aruba na waf di Barcadera. E waf di Barcadera a bira e waf principal di Aruba desde cu a muda e transporte maritimo di container y e waf di barconan chikito pa Barcadera. Mirando cu e edificio existente pa Cuerpo Policial y Migracion Aruba a resulta hopi limita den espacio pa e trabownan importante cu meste wordo ehecuta den cuadro di control y proteccion di nos frontera, minister Bikker a dicidi cu ta necesario pa haci un maximo esfuerso y explora e posiblidad di construccion di un edificio nobo.

Minister Bikker a yama un reunion urgente cu entre otro representante di Astec, sr. Mike de L’isle, Directeur di Directie Scheepvaart, sr. Rene Donata, y Kwartiermaker di e Unidad nobo di KPA ‘Team Vitale Sectoren en Infrastructuur’, sr. Andrew Hoo, caminda cu ela presenta e vision cu ta necesario pa construi un edificio nobo pa Cuerpo Policial y Migracion Aruba na e waf di Barcadera. E proposicion di minister Bikker a haya bon recepcion cerca e representantenan y a keda palabra cu ta bay traha un acuerdo di principio pa por yega na realisa un edificio nobo pa Cuerpo Policial y Migracion na e waf di Barcadera. Cu asistencia di DOW lo por inicia e otro procesonan necesario mas pronto cu ta posibel.

Minister Bikker a keda hopi agradeci pa e cooperacion constructivo y pragmatico ricibi, pa por bay realisa un edificio nobo pa Cuerpo Policial y Migracion Aruba, cual ta sumamente importante den cuadro di vigilancia y control na e waf principal di nos isla. Minister Bikker tambe ta hopi gradici na e empleadonan y nan sindicatonan TOPA, STA, SPA y SEPPA, cu a trece na su atencion cu e facilidadnan existente meste wordo amplia of reemplasa, cual a haya oido y un solucion inmediato door di minister Bikker.