Home International Esun cu paga mas, mag di explota ex casino di Trump na...

Esun cu paga mas, mag di explota ex casino di Trump na Atlantic City

SHARE

 

ATLANTIC CITY – E ciudad di apuesta, Atlantic City ta bezig ta ehecuta e derecho pa primi e boton cu lo ocasiona e explosion pa derumba e ex-casino di Donald Trump. Trump Plaza a cera su portanan na 2014.

Trump Plaza, cu a habri na 1984, no a wordo manteni mas desde cu ela cera. Durante tormentanan a pasa mas bes cu partinan di e structura a sufri daño.

Desde aña 2016 e dos edificionan di e compleho ta den poder di e biyonario inversionista Carl Icahn, un di e financiadornan di mas importante di e actividadnan di Trump na Atlantic City. Na juni e demolicion di e propiedad a wordo ordena despues di algun procedura huridico. E edificionan ta formando un peliger pa e ciudadanonan.

Diaranson a wordo anuncia cu e derecho pa primi e boton dia 29 di januari lo wordo bendi mediante destaho. E placa lo wordo entrega na un club di hoben. 

Icahn ainda no a bisa, kiko e lo kier haci cu e tereno despues di e demolicion. Na 2014 Trump a cuminsa un caso pa kita su nomber for di ariba e compleho, pasobra e ta haya cu esaki tawata atacha su bon nomber y su marca.

Den su temponan bon, Trump tawata tin 4 casino na Atlantic City. Banda di Trump Plaza tawata tin Trump World’s Fair, cu a cera na 1999, Trump Marina cu a wordo bendi na 2011 na esnan cu Trump tawata debe, y Trump Taj Mahal, cu a wordo cera na 2016.

E compania na Atlantic City, den cual e pertenencianan di Trump a wordo hinca, Trump Entertainment Resorts, a pidi declaracion di bancarota na 2004, 2009 y 2014 pa motibo di debenan astronomico.