ORANJESTAD – Diahuebs awo 17 di december for di 5 or di atardi pa 7 or di anochi, miembronan di Aruba One Happy Island lo ta na e rotonde na Tanki Leendert colectando fondo pa nops muchanan di famianan den necesidad. Un invitacion na henter comunidad pa pasa haci bo donacion, tur ta yuda sea ta donacion chikito, mediano of grandi. Durante e dianan di fin di aña, hopi ta esnan cu ta pasando den situacion dificil, mas aun famianan di menos recurso cual ta haci e situacion mas dificil pa nan. E ayudo aki lo yuda trece poco alivio pa famianan den menos recurso, pa e motibo aki nos ta motiva comunidad pa contribui. Santa Claus hunto cu e miembronan Lion y boluntarionan lo tey cu caha special na e rotonde na Tanki Leendert pa ricibi e donacion. Ban haci nos muchanan contento pasobra tur mucha merece un regalo. Ademas tin e oportunidad pa cumpra tapaboca comodo re-usabel den tur size, cual por wordo laba. Esaki sigur ta un bon regalo pa un ser keri keda protega den e temporada di pandemia aki. Tambe tin e oportunidad pa haci un donacion na e cuenta na Arubabank 6005880190 Aruba One Happy Island Lions Club menciona Jingle Bells Charity Drive. Pa mas informacion y pa sigui e evento sintonisa diasabra Radio Latina 92.3 FM of sigui Facebook page di Aruba One Happy Island Lions Club. Ban duna un man y haci bo donacion, tur florin ta yuda.
