Alemania ta implementa lockdown mas pisa

BERLIN (AP) — Alemania a raporta un nivel record di morto pa motibo di coronavirus y a dicidi pa implementa un lockdown mas pisa diaranson, cerando tienda y scolnan pa purba baha e contagionan diario.
E pais a raporta 179.8 morto pa cada 100,000 residente durante e ultimo 7 dia. Un record nobo compara cu e 149 morto pa cada 100,000 residente cu a wordo raporta un siman pasa door di Robert Koch Institute, e centro pa maneho di malesa di e pais.
Esaki a pone e cantidad di morto pa motibo di e pandemia yega 23.427.
Na October ya caba por a mira un aumento y Alemania a implementa un “light lockdown” na comienso di november, cual a pone cu bar y restaurantnan mester a cera, pero tiendanan por a keda habri. E medida aki a resulta den un paro di e subida di e contagio diario, pero no a baha e cantidad di contagio diario, locual a pone cu mester a tuma medidanan mas estricto.
Banda di ceramento di tienda a bai over na online learning y a limita interaccion den famia na un maximo di 5 persona.
Supermercadonan, botica, stacion di gasolin, banconan y otro negoshinan cu ta duna servicionan esencial, incluyendo bendedornan di kerstboom, por keda habri.
Na Saxony, na unda e virus ta plamando rapidamente na e momento aki, hospitalnan ta yenando. E gobernador di estado a bisa cu mas restriccion por bira necesario, catalogando e situacion caminda hopi hende ainda ta saliendo y aglomerando, como uno “toxico”.
E restriccionnan a wordo extendi te cu dia 10 di januari y e ultimo encuestanan ta mustra cu mas di 80% di Alemannan ta aproba e medidanan di lockdown y asta ta pensa cu nan mester ta mas estricto.
Alemania a wordo aplaudi pa su medidanan di control pa cu e pandemia na comienso di aña, pero asina cu hendenan a cuminsa bira slordig cu distanciamento social y reglamentonan pa cu mondkapje, e casonan a cuminsa subi.
Mientras e contagio diario na maart tawata mas o menos 6.000, awor nan ta mas cu 4 bes mas hopi, na un nivel di 27.728 caso nobo pa diaranson, segun Robert Koch Institute.
Autoridadnan Aleman a urgi reguladornan di Union Europo pa acelera e aprobacion di un vacuna. Ta spera cu vacunacion lo por cuminsa prome cu fin di aña pero ta keda urgi e pueblo pa keda tin pasenshi y tene nan mes na reglanan durante dianan di fiesta.
Minister di salud Jens Spahn a bisa cu Alemania ta cla y lo cuminsa vacuna dentro di 2 pa 4 dia despues di aprobacion.
“Pa e siguiente verano nos lo por yega bek na normalidad,” el a bisa.