Pareha baha for di avion pasobra nan yiu no kier bisti mondkapje

COLORADO – Eliz Orban, su casa y su yiu di 2 aña, Edeline, a wordo pidi pa bandona avion na Colorado pasobra e mucha no kier a bisti mondkapje. Segun Orban e situacion fastioso aki a pone cu nan no mag di bula mas cu United Airlines.
Locual mester a bira un bishita ameno di famia y amigonan na New Jersey a caba na drama. Ariba portretnan cu e muher a pone ariba Twitter por a mira con su casa ta purba bisti e mucha e mondkapje. Pero e mucha ta keda pone su mannan dilanti su cara y tur intento pa logra haci esaki a fracasa.
Despues di un rato un empleado di United Airlines a bin y pidi nan pa piki nan pertenencianan y bandona e avion. A pesar cu a roga e empleado pa no haci esaki, toch e famia mester a sali for di e avion. Ora a yega pafo na e terminal, otro sorpresa tawata warda nan. Nan maletanan, incluyendo e carseat di Edeline, a keda atras den e avion. „Nos mester a warda te su mañan pa nan entrega e maletanan na nos cas y esaki ta keda dos ora leu for di aeropuerto.”
Segun United Airlines e famia ta bon bini back cerca nan. „E salud y siguridad di nos empleadonan y pasaheronan ta nos prioridad. Nos ta investigando e incidente aki y a tuma contacto cu e famia. „Nos a debolbe e placa cu nan a paga pa nan pasashi.”