ORANJESTAD – E homber C.D. tabata basta emociona durante tratamento di e caso penal cu Ministerio Publico a cuminsa contra dje.
Aruba Native por a compronde cu C.D. ta para riba cu e no a horta na un perfumeria riba 6 September 2020.
Hues a confront’e cu e hecho cu Polis a bay investiga, un rato despues di cu e ladronicia a sosode na e perfumeria. A mira C.D., un conoci di Polis, ta cana lomba sunu cu un hemchi den man. Den e hemchi tabatin un flanel berde.
Riba e video di seguridad di e perfumeria ta mira tres hende drenta y un di e hendenan tabatin un flanel berde y un hemchi. Ademas Polis ta reconoci C.D. entre e ladronicia. Esaki na su forma di actua ya cu tur e ladronnan, nan cara tabata tapa.
Segun C.D. el a sali for di su cas pa haci dilanti cas limpi. El a mira un hemchi banda di cas y a coy e hemchi pa benta sushi aden. El a mira Polis pasa mientras cu e tabata haci dilanti cas limpi.
Hues a mustra cu Polis ta bisa cu nan a mira e conocido di Polis, Chito, ta cana cu un hemchi. Ora Chito a mira Polis, el a cruza bay otro banda di caminda y ranca yierba manera cu e tabata haci limpi. Segun C.D. ta banda di su cas e tabata y Polis a detene. Hues a mustra cu Polis a mira e video di seguridad y a reconoce un di e personanan como C.D.
C.D. a bisa Hues cu esaki ta un set up. E tin 8 aña sin ta cay den man di husticia. El a bisa cu si el a haci’e, lo mester a haya su fingerprint na e lugar y riba e hemchi. E tabata hopi emociona y a bisa cu e no tin nada di haci cu e caso. Hues a remarca cu C.D. a bisa Polis cu el a haya e flanel benta abao y a hinca esaki den e hemchi.
C.D. ta para riba cu e no tin nada di haci cu e ladronicia. Hues a bisa cu tin un persona cu a bisa cu el a topa C.D. kende a bise cu el a caba di horta na un perfumeria y e tin cos di bende pero e tin cu bay pasobra Polis ta busk’e. El a bisa Hues cu e no ta choller mas y no ta biba riba caya. El a bisa cu e tabata traha pero e compania a bati bancarota y pesey el a bay horta.
Fiscal ta haya legalmente proba cu C.D. a horta na e perfumeria. Fiscal a bisa cu e por compronde cu C.D. tabatin problema financiero pero no por bay horta. Fiscal a exigi 12 luna di prison.
Hues a sera tratamento di e caso y a dicta sentencia di biaha. Hues ta haya cu for di investigacion ta mustra riba C.D. Hues ta haya legalmente proba cu C.D. a horta na e perfumeria. Hues a mustra cu ladronicia ta sumamente fastioso pa negoshi cu ta pasando ratonan hopi fastioso door di Covid. E daño ta 20 mil florin. Hues a remarca cu C.D. a haci e delito aki den dos tempo di prueba. Hues a condena C.D. na 8 luna di prison.