ORANJESTAD: Banco di Caribe ta masha orguyoso di su colega Shariska Winterdal cu diadomingo ultimo a realisa un hazaña historico, na momento cu e’la finalisa un Double Iron Woman Challenge. E hazaña increibel aki tabata na beneficio di ‘E Spirito Arubiano’ y tabata pa recauda fondo pa Fundacion Frank Polanco cu tin como meta pa financieramente yuda muchanan cu a keda huerfano, sostene e famia/voogd cu ta keda atras pa sigui cuida y guia e mucha.
E ruta:
Den e challenge aki Shariska a landa 8 km, pa despues cycle 360 km y finalmente core 84 km. E ruta di e challenge tabata uno realmente cu desafio fisico, pero Shariska a demostra perseverancia y determinacion. E’la landa, saliendo for di Arashi – sigui pa Fishermen – y bin bek Arashi (2x) pa un total di 8 km. Pa despues subi su bicicleta y cuminsa e trayecto Arashi – High rise hotel – Eagle beach – LG smith Blvd – Barcadera – Savaneta – Zeewijk – San Nicolas te cu Citgo Esso Height – Savaneta – Drive inn Sta Cruz – Piedra Plat – Paradera – Tanki leendert – Tanki Flip – Noord – Arashi (e buelta aki 5x y 1x te cu Pos Chiquito y bek Arashi) – pa un total di 360 km. Ora e’la termina esey, e’la inicia e trayecto pa core for di Arashi – High rise hotel – LG Smith BLVD – Linear Park (Plaza turismo) – bay bek Arashi e mesun ruta (e buelta aki 3x)- pa un total di 84 km.
Muestra di disciplina y dedicacion!
Banco di Caribe ta felicita Shariska Winterdal pa su logro como Iron Woman y ta masha orguyoso di su colega. Masha Pabien!
