Oranjestad – Departamento di Cultura Aruba (DCA) ta yegando otro fin di aña y en conexion cu dianan di fiesta di Pasco y Aña Nobo, DCA lo ta cera pa publico di dia 24 di December 2020 te dia 3 di januari 2021.
DCA ta wak bek riba un aña hopi diferente. 2020 a trece hopi reto inespera cu e pandemia di Covid-19 riba nos isla. Varios evento planea no por a sigui normal, mester a haci esakinan cu condicionnan no usual y segun maneho di Gobierno y regla di DVG.
Arte di Palabra a tuma luga den forma virtual. Gang di Arte a uni cu e proyecto ‘Dream Dare Do’ y su presentacion tabata uno piloto pa haci presentacion den Cas di Cultura segun reglanan di DVG y Crisis Team na unda esaki a sirbi pa mustra con e normal nobo lo ta den Cas di Cultura cu un publico di bishitante limita.
E proyecto escolar di San Juan, DCA a reparti USB cu animacion den forma di video educativo pa nos muchanan di ‘Shon Wantomba y e Celebracion di Fiesta di San Juan’ na tur scolnan basico.
Celebracion di San Juan pa publico di e aña aki a bay den un otro forma, mirando cu eventonan publico a keda cancela. Unoca, CCDN y DCA a sinta hunto na unda a haci e celebracion diferente cu transmision enbibo via Tele Aruba di e celebracion di San Juan, dera gay cu a keda transmiti pa henter Aruba riba dia 24 di juni 2020. DCA, Fundacion Rosea Cultural, Masiduri y varios boluntarionan bou guia di Jhon Freddy Montoya, coordinado di proyecto na DCA a haci un bunita Tableau Vivant relaciona cu celebracion di San Juan riba e caminda grandi dilanti di Direccion di Aviacion Civil. Akinan a realisa dos presentacion na unda e automobilistanan por a aprecia esaki den ora di mainta y atardi riba dia 24 di juni.
E situacion di Covid-19 ta reta DCA pa haci mas actividad den forma virtual y bira mas visibel ‘online’ pa publico. A experimenta hunto cu ‘partners’, Fundacionnan, Comision, Scol y boluntarionan pa realisa proyectonan digital. Tambe a participa na proyecto, Webinar, y tayernan virtual asina siña di otronan. A realisa varios reunion di staf y di website virtualmente.
DCA a forma parti un biaha mas cu Poder di Hubentud cu sosten di colega Jhon Freddy.
DCA ta sigui tambe experimenta cu medionan digital y lo sigui informa y educa publico riba e herencia cultural di nos isla.
Siguientemente DCA ta realisa hunto cu CCDN, Fundacion Cultural Festivalnan Folklorico, y Comision Pro Cultura e celebracion di nos tradicion di fin di aña, esta nos DANDE.
E aña aki lo conoce un festival di Dande estilo virual y danki na Aruba TV. Pa medio di nos medionan di comunicacion lo yega den tur hogar aki na Aruba y internacionalmente.
Director di DCA ta gradici tur esnan cu a sostene nan den 2020 y sigur ta sigui conta riba nan cu e mesun apoyo den 2021.
Director, staf y personal di DCA ta desea un y tur feliz dianan di fiesta y laga nos cuida nos mes, nos sernan stima. Ban stimula otro pa cuida nos salud!
Bon Pasco y Bon Aña 2021.
Cultura nos tin cu Bib’e.
Nos ta Cultura.