Oranjestad, Aruba – Aruba Bank ta sigui promove arte y cultura por medio di su patrocinio di “Kids & Youth Christmas Song Festival”.
Un total di 21 mucha a forma parti di e festival, den 3 categoria: di 4 pa 7 aña, di 8 pa 11 aña y di 12 pa 17 aña. Meta di e Festival di Canto aki ta pa no laga nos cancionnan di Pasco na Papiamento conoci como cancionnan di Pasco Clasico bay perdi.
Entre nan nos por menciona: Ora Solem, Den un Stal, Bon Bini niño keri, Keto Keto Keto, A nace un Niño, Awe t’un dia grandi y tambe dunando oportunidad pa cancionnan di Pasco nobo riba mercado por medio di propio composicion. Unico rekisito pa por a participa na e festival aki, ta cu e cancion mester ta di Pasco y den idioma Papiamento.
E acostumbrado All Star Band, bao di encargo di e conocido Danny Koolman, a compaña e muchanan. Tin di remarca cu e banda a sa di demostra durante tur e ocho añanan aki un amor inmenso pa mucha y semper tin e pasenshi pa sa di guia cada un di e participantenan.
E banda a consisti di e siguiente musiconan: Danny Koolman, Diego Henriquez, Julius Martines, Jeff Gomez, Otmar Manuela, Muki Greaux y Randy Koolman. Sin laga afo e coristanan Nicole Martines-de Kort, Janaika Henriquez y Sharline Hernandis.
Pabien na organisadornan y participante!