Home » Compleho di IMAX “Gloria” ta unico den Caribe Gobierno ta gradici famia de Veer y MetaCorp p’e confiansa den Aruba

Compleho di IMAX “Gloria” ta unico den Caribe Gobierno ta gradici famia de Veer y MetaCorp p’e confiansa den Aruba

by Admin
0 comment 60 views

 

 

ORANJESTAD, Aruba –  “Tin cu cuminsa na gradici y felicita famia de Veer y MetaCorp pa demostra un confiansa enorme den economia di pais Aruba den temponan mas dificil di historia. Di a kere den economia y progreso di Aruba pa haci un inversion di mas di 40 miyon florin. Nan a crea mas di 100 cupo di trabou den cinema super moderno. E ta un compleho unico den henter Caribe”, asina Dangui Oduber, Minister di Turismo, Salud Publico y Deporte a indica. 

 

Ta trata aki di un compleho multi funcional cu no tin solamente cinema pero tin restaurantnan, cafe’s y area di hunga pa mucha. E ta un facilidad unico den henter Caribe y e lo ta un balor agrega na localnan, pero tambe turismo. E mandatario ta sumamente gradici y ta impresiona di e inversion haci den innovacion y tecnologia.

 

Aruba so tin e na e momentonan aki. “Mi kier gradici famia de Veer y Metacorp pa haci e inversion aki. Mi ta sigur cu e lo bay crea un spin off economico, a crea cuponan di trabou, un atraccion, un balor agrega na nos localnan, pero tambe nos turismo,” el a expresa.

 

Glenbert Croes, Minister di Asuntonan Social y Labor a gradici pa nan confiansa den Aruba. Tambe a gradici pa nan compromiso di sigui inverti den economia Arubiano, specialmente den momentonan dificil. E mandatario ta gradici p’e cantidad di cuponan di trabou genera cu e inversion aki.

 

Segun e mandatario Eddie de Veer, yiu homber di Eduardo de Veer, a bis’e mas di mil hende a solicita pa traha eynan. Esaki ta un señal con hopi proyectonan asina aki por yuda duna masha hopi yiu di tera trabou bek. Duna nan un calidad di bida, un forsa pa nan para bek riba pia. “P’esey mes como gobierno, nos mester keda duna desaroyadonan di proyectonan asina tur e apoyo cu nan mester,” minister Glenbert Croes a expresa.

 

“Nos ta habri brasanan pa inversionistanan di afo, pero mester brasa inversionistanan local cu ta inverti localmente y genera cuponan di trabou, genera comercio y prosperidad localmente. P’esey na henter famia de Veer y famia di MetaCorp un danki grandi pa nan fe y confiansa den Aruba”, asina minister Glenbert Croes a termina bisando.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio