No. Pa algun motibo, mondkapje y distanciamento social ta keda wordo recomenda pa algun tempo despues cu hendenan a wordo vacuna.
Pa cuminsa, e prome vacunanan ta rekeri 2 dosis. Pfizer su segundo dosis lo bin 3 siman despues di e prome y esun di Moderna lo bin despues di 4 siman. Y e efecto di vacunanan en general no ta inmediato. Hendenan ta haya un cierto nivel di proteccion dentro di algun siman despues di e prome dosis.
Pero pa proteccion completo lo mester warda algun siman despues di e segundo dosis.
Te ainda no ta conoci si e vacunanan di Pfizer y Moderna ta proteha hende contra e infeccion of solamente contra e sintomanan. Esaki kiermen cu hendenan vacuna lo por wordo infecta y contagia otronan, aunke cu esaki lo pasa hopi menos frecuente, segun Deborah Fuller, un experto di vacuna na University of Washington.
Y asta ora cu e vacunanan yega y wordo poni disponibel pa administra, lo tuma lunas pa vacuna cientos di miyones di hende.
Fuller tambe a remarca cu testing di vacuna den mucha a penas a caba di start, pues mucha no lo por wordo vacuna te ora cu tin suficiente informacion cu ta indica cu e ta safe y efectivo pa mucha tambe.
Moncef Slaoui, e hefe encarga cu e departemento di desaroyo di vacuna na Estados Unidos, a pronostica cu e pais lo por yega na nivel di herd immunity na mei 2021, basa ariba e efectividad di e vacunanan di Pfizer y Moderna. Esaki, asumiendo cu no lo tin problema pa cu e demanda y cu suficiente hende bai di acuerdo pa wordo vacuna.