ORANJESTAD – A.T.A. ta desea pa informa nos comunidad di e situacion actual pa loke ta trata e industria turistico, conforme informacion compila na e momentonan aki.
TURISMO ‘STAY-OVER’
Durante luna di november 2020 nos isla a yama bonbini na un total di 29.714 bishitante ‘stay-over’. Di e bishitantenan aki, 27.637 tawata procedente di Norte America y 1.372 tawata procedente for di diferente paisnan Europeo. 705 bishitante tawata procedente di otro pais/islanan den region. Ora compara e resultado cu e scenario optimista y conservativo, por mira cu e resultado ta mustra un subida di 36% compara cu october, pero cu e resultado ta bao di e scenario conservativo.
E BISHITANTE Y ACOMODACIONNAN
35.8% di nos bishitantenan a keda na un high rise hotel y 7.8% a keda na un low rise hotel. 41.2% a keda na un di nos timeshare resorts. 24.6% a keda den acomodacionnan alternativo. E edad di mayoria di nos bishitantenan durante luna di november tawata entre 30 pa 39 aña (5.821) y entre 50 pa 59 aña (5.662).
HOTELNAN / AHATA
Segun Aruba Hotel and Tourism Association, na november 2020, e ‘Average Daily Rate’ (ADR) a aumenta cu 9.7% compara cu e mesun luna na 2019. Esaki den cifra ta US$ 235.74 na 2019 compara cu US$ 258.65 pa 2020. E entrada pa camber disponibel, e asina yama RevPAR a baha cu 69.3% di US$ 197.89 na 2019 pa US$ 60.83 na 2020.
E ocupacion den nos hotelnan a baha cu 72% compara cu november 2019.
E cifranan di AHATA ta basa riba 19 propiedadnan y 6 timeshare hotels, cual ta mayoria di e hotelnan cu excepcion di Hilton Aruba Caribbean Resort & Casino.
KICO POR SPERA PA DECEMBER 2020?
Basa riba diferente desaroyo actual, y tambe analisisnan pa loke ta trata e transporte aereo, ta proyecta cu december 2020 por trece alrededor di 45.000 bishitantenan ‘stay-over’ pa nos isla – loke ta 50% mas di loke ta e resultado pa november 2020. Si compara esaki cu e resultado total di 2019 por mira un reduccion di 67% – y na unda nos a recupera 33% di e total di nos turistanan ‘stay-over’.
Aki por conclui cu por cera e aña cu loke a wordo proyecta riba e scenario conservativo. Algun factornan cu mester tene na cuenta ta cu na december a bolbe habri frontera pa bishitantenan di Latino America, pero tambe e bishitantenan adicional cu por spera di Hulanda, y e introduccion di un vuelo pa siman, non-stop di TUI for di Inglatera pa Aruba.
Ademas, mirando cu e casonan positivo di Corona ta aumentando na Merca, mester tene cuenta cu posibel cancelacionnan for di e region aki.
TURISMO CRUCERO
E industria di crucero a paralisa desde inicio di e pandemia y ainda no tin fecha concreto riba re-inicio di operacion den e region di Caribe. E industria ta pendiente pa CDC (Centers for Disease Control and Prevention) aproba e recomendacionnan di e protocolnan relaciona cu COVID-19 pa barconan di crucero. Na november y awo na december 2020, Aruba no a ricibi turistanan crucero.
E situacion di e barconan cu por mira staciona den nos waf ta un asina yama ‘warm lay-up’ cual kiermen cu e barco ta riba un standby, wardando riba instruccion na momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. No tin turista riba e barconan pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke ta e pandemia actual.
TOURISM CREDITS / CENTRAL BANK OF ARUBA
Di acuerdo cu Banco Central e asina yama ‘Tourism Credits’ (cual anteriomente tawata wordo yama ‘Tourism Receipts’) pa e prome kwartaal di aña 2020 a contribui cu AWG 1.017.9 miyon den nos economia, cu ta 7% menos compara cu e mesun temporada na 2019. Esaki naturalmente ta debi na e pandemia global di Covid-19 unda Aruba tambe a cera su fronteranan temporalmente cual a inicia na luna di maart 2020 te cu juli 2020.
Mescos cu otro destinacionnan, nos isla ta pasando den momentonan di reto pa loke ta trata e pandemia aki. Ta importante pa nos tur sigui e protocolnan manera stipula door di diferente instancianan. Hunto nos lo vence y nos isla y su turismo lo sigui florece.
