Home Corte A pospone caso di 46 bara di oro haya den maleta na...

A pospone caso di 46 bara di oro haya den maleta na aeropuerto

SHARE

 

ORANJESTAD – Awe mainta den un sala di Corte di Husticia a tuma lugar e caso penal contra e hombernan Venezolano J.T.R. biba na Aruba, R.G.Z. biba na Aruba. Nan ta e sospechosonan relaciona cu e caso di mas cu 2 aña pasa caminda na aeropuerto a haya R.G.Z. cu 46 bara di oro den su maleta.

Aruba Native por a compronde cu no tabatin tratamento di e caso sino Hues mester a dicidi riba peticion di abogadonan, kendenan kier a scucha diferente testigo, entre otro un miembro di R.S.T.

E acuscion cu Fiscal a presenta contra J.T.R. y R.G.Z. ta cu dia 9 di Februari 2018, nan ta wordo sospecha di labamento di placa y falsificacion di documentonan.

Dia 9 di Februari 2018, a detene R.G.Z. cu e 46 baranan di oro den su maleta. Abogado mr. Sulvaran ta haya cu a base di informacion no concreto, RST a bay haci investigacion siendo cu no tin nada ilegal. El a bisa cu Fiscal por a pidi Douane informacion y lo a haya sa cu e transporte di oro tin 1 aña ta andando sin ningun problema y ta legal.

E abogado ta haya cu investigacion no tabata necesario y esaki a afecta e clientenan. For di investigacion haci a conclui cu no tin nada di smelt oro aki na Aruba manera tabata insinua. E abogado a bisa cu ta den zona liber na Douane e oro tabata keda, pues ningun momento e oro ta sali for di Douane pa bay smelt. E ta haya cu aki ta un set up sin informacion concreto. E abogado ta haya cu intencional a usa informacion no corecto. E ta haya cu Hues mester tuma sancion pa e forma di actua aki di Ministerio Publico.

E abogado tambe a cuestiona e hecho cu RST, sin notifica abogadonan, a bay scucha e testigo homber Venezolano A.C. y despues a lag’e bay, sin tin su address na Venezuela. E ta haya cu esaki tabata intencional pasobra nan sa cu R.G.Z. tin abogado y cu A.C. lo bay for di Aruba sin cu sa su adress na Venezuela. E abogado a bisa Hues cu e kier scucha A.C. pasobra e ta importante pa mustra cu no ta asina manera Ministerio Publico a laga sa cu trece oro for di Venezuela ta ilegal.

Mr. Sulvaran a señala cu tin mal interpretacion di traduccion di Spaño na Hulandes. El a cuestiona tambe e forma cu un miembro di RST a traha procesverbaal y a traha su conclusion cu tin labamento di placa. Esaki no por. El a splica cu R.G.Z. ta viaha cu oro den maleta pa garantiza cu e oro ta yega Dubai sin risico cu e oro lo por wordo horta. E abogado a pidi pa scucha 4 testigo, entre otro e miembro di RST.

Abogado mr. Mohamed a bisa Hues cu e kier scucha R.G.Z. como testigo y ta uni na punto di bista di mr. Sulvaran.

Fiscal a reacciona riba mr. Sulvaran, cu a haci investigacion sin informacion concreto. Fiscal a bisa Hues cu unavez cu tin sospecho por cuminsa cu un investigacion. Pa cu e acusacion cu e informacionnan no ta concreto, e no ta haya cu e abogado a specifica kico no ta concreto. Pa loke ta e testigo A.C., Hues a puntra Fiscal si tin adress di A.C. Fiscal a bisa cu e no tin adress di A.C. pero lo bay check si RST tin esaki.

Hues su decision ta cu e ta rechaza peticion di scucha dos di testigonan y tambe A.C. pasobra e ta haya cu mr. Sulvaran no a argumenta e interes pa cu e defensa. Tambe Hues a rechaza e scuchamento di e miembro di RST, pasobra e no ta un experto riba oro. Hues a aproba pa scucha e dos sospechoso y e testigonan C. y M. Hues ta haya cu no por fiha un fecha ainda pero kier pa e bay mas liher posibel pa Hues Comisario haci interogacionnan. E caso a keda posponi te otro aña.