Home Dutch Kingdom Ora bo haci doño ariba cos cu no ta dibo, officier retira...

Ora bo haci doño ariba cos cu no ta dibo, officier retira despues di ta uza dienst auto pa motibonan personal

SHARE

 

Un officier di Koninklijke Luchtmacht a wordo despedi di trabou pa motibo di a uza de bes en cuando e auto di dienst pa motibonan priva. E homber a traha desde aña 1985, pues 32 aña, pa Ministerio di Defensa na unda desde 2014 el tawata ocupa e funcion di hoofdofficier.

Na comienso di 2017 el a asisti na un reunion, den cual su hefe a enfatisa cu e uzo di auto di dienst pa motibonan priva, ta prohibi. Tambe a wordo menciona, cu transportacion di yiunan y di otro hendenan cu no ta forma parti di e personal di defensa, no ta permiti.

E motibo pa e reunion ta cu recientemente trahadornan a cuminsa hiba autonan di dienst cas pa uzo priva. Esaki mester a wordo gestop. Asta wordo entrega keho na Koninklijke Marechaussee.

E incidente a wordo investiga y durante e investigacion e sospecho a lanta, cu e officier tambe tawata uza su auto di dienst frecuentemente pa motibonan priva. Durante un interogacion el a admiti cu entre maart y november 2016 el a haci uso 16 biaha di e auto di dienst pa motibonan personal.

Despues di e reunion di advertencia, el a bolbe haci uzo 4 biaha di e auto di dienst, di cual un biaha pa transporta si yiu muher. Motibonan tawata segun e, un combinacion di stress, comfortabilidad y no tin otro vehiculo disponibel’.

E officier no a acepta su retiro y a bai hues. Segun e, e reglanan no tawata suficientemente explicito. Tambe, e straf aki lo tawata demasiado pisa compara cu otro casonan.

Tres otro colega cu tambe a haci uzo di e auto di dienst pa motibonan priva, lo a haya solamente un advertencia. Tambe el a mustra ariba un problema den relacion di trabou cu su superior.

Ni rechtbank ni Centrale Raad van Beroep (CRvB) a haya e argumentonan aki acceptabel. Na mei aña pasa rechtbank a duna rason na su doño di trabou. Y for di un sentencia cu a wordo duna ayera a resulta cu e homber a bolbe perde su apelacion na CRvB.

Segun tanto e rechtbank como CRvB e medida aki ‘no ta desproporcional compara cu e tipo y seriedad di e malcomportacion’. Desde e reunion na januari 2017 e militar tawata sa cu esaki no lo wordo permiti mas. A pesar di e advertencia aki el a dicidi toch pa sigui. E situacion di e tres otro coleganan no tawata comparabel.

E carrera largo di e homber den e caso aki a traha den su desbentaha. “Di militarnan ta wordo spera un grado halto di profesionalismo y parti di esey ta: duna un bon ehempel”, CRvB a remarca. “Esaki ta conta particularmente pa un officier cu un trajectoria di mas di 32 aña.”

Aki na Aruba tambe e fenomeno aki ta tuma luga, dia aden y dia afo. Tur dia por mira esaki, tur sorto di dienstwagen ta ariba bou, haciendo compras, buscando yiu na skol, bay gym y haci compras na supermercado. Manera nada un pasa.

Tin algun departamento cu ambtenaarnan ta haci “doño” di e vehiculonan aki mientras ta e pueblo pagado di belasting ta paga e esaki pa e core.

Berdad tin momento cu e ambtenaarnan mester di e vehiculo, pero durante di ora trabou y no 24/7, debi cu ningun persona ta labora 24/7.