Home Politics Booshi Wever: NOS HOSPITAL LO BIRA UN SUCURSAL DI E HOSPITAL NOBO...

Booshi Wever: NOS HOSPITAL LO BIRA UN SUCURSAL DI E HOSPITAL NOBO NA CORSOU?

SHARE

 

 

Den e acuerdo di Black Friday tin un capitulo “Zorg” (F1 y F2) cu ta stipula cu lo mester bay tin un cooperacion  entre e hospitalnan riba e islanan. 

 

UPP a tuma nota di deliberacionnan den tur secrecia ya a tuma lugar encuanto maneho di e cuido hospitalario di e islanan cu antes tabata conforma Antias. 

UPP por a tuma nota di un post riba Facebook cu parce cu dia 8 di december 2020 lo  mester a finalisa e deliberacionnan entre e islanan involvi, cu firmamento di un acuerdo pa un cooperacion mas estricto entre e diferente hospitalnan. Pero cu esaki a wordo posponi riba peticion di Aruba y St. Maarten. E motibo ningun hende sa.

 

Kico ta e caso? Prome cu a firma e acuerdo riba Black Friday, ya for di  dia 18 di juni un grupito piloto encabesa pa sr. Freek Korver, ex-director di e hospital di Aruba, a presenta un plan cu ta carga e titulo: “Samenwerking regionale ziekenhuizen in het Caribisch deel van het Koninkrijk Der Nederlanden”! Den e plan a presenta tres opcion pa formalisa un mihor cooperacion entre e hospitalnan den regio. E prome opcion ta igual na loke ta existi awor aki. Cada hospital ta autonomo, pero lo percura pa un mihor cooperacion. Opcion 2 ta encera un cooperacion mas estrecho y opcion 3 ta nifica cu e hospitalnan lo wordo maneha central. 

 

Parce cu e interes di esnan envolvi ta pa implementa opcion 3. Esey nifica cu nos hospital lo wordo maneha door di un organo ala COHO, esta central, perdiendo asina tur autonomia. Den e argumentacion pa e opcion 3 ta indica cu e cooperacion no ta boluntario y cu e interes di e entidad lo prevalece riba e interes particular di cada hospital. Opcion 3 lo brinda e oportunidad pa traha mas eficiente loke lo por nifica mihor calidad y menos gasto. Di otro banda ta expresa cu mester di “DRAAGVLAK POLITICO”, pa durante e proceso di formalisacion di e cooperacion, escohe pa un hospital cu lo ta responsabel pa cuido di tur isla. Tambe ta menciona cu na principio e gastonan lo ta halto, pero cu despues lo esaki lo por bira menos. 

 

UPP ta haya e forma cu henter e desaroyo aki a tuma lugar masha remarcabel, pasobra aki ta trata di un cambio formal den e forma cu cuido hospitalario lo wordo brinda na nos pueblo. Te cu awor nos mes a atende cu e cuido di un forma autonomo y generalmente cu exito.

Ta berdad cu e cuido medico a bira mas caro y cu ta necesario pa evalua den ki forma lo mester brinda un cuido di calidad, pero pagabel. No por ta asina sinembargo cu den un habri y cera di wowo decisionnan importante, cu un embergadura asina trancedental , ta wordo tuma SIN NINGUN TIPO DI INFORMACION Y DEBATE aki na Aruba mes. Pues no tin TRANSPARENCIA atrobe. Kico a para di e participacion di e stakeholdernan, manera sindicatonan y tambe asociacionnan medico y di otro tipo di cuido?

 

Un otro interogativa ta kico e rol di e gobierno di Aruba ta den henter e deliberacion cu a tuma lugar, pasobra parce cu esnan envolvi pa Aruba ta e ex-director di hospital y awor tambe e director actual cu a caba di yega Aruba. Pues atrobe e ARUBIANO a wordo laga afo.

Ken su interes nan lo ta representa? Ta hopi remarcabel cu den opcion 3 tin casi tur e ingredientenan cu ta poni den e capitulo F1 y F2 di acuerdo traicionero y strangulante recientemente firma entre Aruba y Hulanda.

Otro pregunta ta kende lo bay dirigi e Hunta Central? Parce cu un candidato fuerte ta e ex –director cu segun nos a compronde awor tambe a bira miembro a.i. di Raad van Bestuur di un hospital grandi na Nijmegen. Atrobe no tin un ARUBIANO pa ocupa e posicion aki?

 

Sin cu UPP kier desacredita e experiencia y experticio di e personanan envolvi den e deliberacion. Nos interes ta pa sa dicon tanto secrecia? Unda nos expertonan local ta? Unda Parlamento a keda, pasobra den e plan mes a wordo stipula cu cada isla ta responsabel pa crea un “draagvlak” politico? Pakico no tabata honesto cu nos pueblo cu deliberacionan encuanto e cuido hospitalario tabata tuma lugar? Riba dje Aruba a compromete su mes pa paga un suma descomunal di casi 1 biyon florin pa construcion y renovacion di nos hospital. E suma aki lo mester wordo paga door di nos pueblo Arubano, mientras cu e construccion di e hospital na Corsow a sosode parcialemente cu ayudo financiero hulandes. Ta mas cu obvio cu e intencion di Hulanda lo bay ta pa promove un cuido hospitalario di tur isla centralisa na e hospital nobo situa na Corsou. Kico esaki lo nifica pa e cuido na Aruba? Nos a bira “plato de segunda mesa”? 

Mas insolito ta cu ningun caminda ImSan ta wordo menciona corda involvi. Den pasado tabata e intencion cu ImSan lo cera acuerdonan di cooperacion cu e otro islanan, dicon awor ImSan a wordo exclui? 

 

UPP como partido politico sin representacion den Parlamento no tin e posibilidad pa exigi un reunion publico (no un bijeenkomst) tuma lugar den Parlamento, pa puntra e minister bin responsabilisa su maneho den e caso aki. Pa medio di e articulo aki nos ta haci un apelacion na e partidonan cu si tin representacion den Parlamento pa cumpli cu nan deber di controla gobierno.

Ta parce cu te hasta den Cuido Aruba lo bai cana COHO djis pa sirbi interes aheno.

Ta parce cu te hasta den e Cuido Hospitalario cu Aruba tabata completamente autonomo lo bai perde esaki pa motibo di e mentalidad entreguista di e gobiernonan di e ultimo DIEZ AÑANAN