Home Politics Segun Parlamentario Richard Arends (AVP) Debe di 90% nunca a existi

Segun Parlamentario Richard Arends (AVP) Debe di 90% nunca a existi

SHARE

 

 

Un di e gritonan mas fuerte di nos opositornan politico, como tambe e motivacion di un supervision financiero estricto y introduccion di medidanan manera e ‘crisisheffing’ tabata hecho cu lo tabata tin un debe descontrola y insostenible. Awe e gabinete actual y e colegio di supervision financiero pa Aruba ta confirma cu esaki nunca a existi. Den su carta di 20 di november ultimo, CAFT ta confirma cu na aña 2016 – un aña prome cu eleccion – e debe nacional tabata na 76%; e aña di eleccion na 2017 esaki tabata na 77% y  na aña 2018 e tabata na 75%. “Mirando cu nos economia e sufri un double dip, segun e rapportnan di IMF, asina mes e no ta yega nada serca di loke ta wordo bisa te awe como hustificacion di e medidanan,” Parlamentario Arends a declara. Segun e extension di e ley di supervision financiero e tempo ey como tambe aumento di BBO tabat totalmente infunda. 

 

E investigacionan di Contraloria General (Algemene Rekenkamer) tin como meta ta pa contesta e pregunta si gobierno a tene su mes na presupuesto. E conclusion cu Contraloria General ta tuma ta cu resultado di 2018 ta pio cu  e aña anterior. “E maneho financiero cu a wordo hiba na 2018, no por sostene un mehoracion den finansa publico manera cu a wordo priminti. Contraloria General ta confirma cu na aña 2018 gobierno tabatin un aumento di gasto y gastonan ta surpasa loke Parlamento a aproba den e presupuesto. Como cu Gobierno no a splica e discrepancia aki, e ta hasi e tarea di Parlamento como controlador di Gobierno imposible,” Parlamentario Arends ta splica.

 

Den su conclusion Contraloria General no por garantisa tampoco cu gasto y entradanan ta legitimo, nan ta integro y tampoco exacto. “Contraloria General ta pone enfasis riba gastonan di subsidio, gastonan di personal, Serlimar, Postkantoor y e gastonan cu ta regarda e Sociaal Crisisplan: no tin un bista con e fondonan aki a wordo gasta. Loke por saca afor di e cuenta anual 2018 ta cu maneho financiero cu a wordo presenta na 2017 no a funciona,” Parlamentario Arends a sigui bisa. “Laga nos no ni bay papia di kico lo ta 2019 y 2020 pior ainda si nos sigui e consehonan reciente di CAft.” 

 

Parlamentario Arends a conciente su cu durante e tratamento di e cuentanan anual ta mirando atras na resultado di dos aña pasa, pero e ta confirma si loke fraccion di AVP a bin ta bisa y a trece dilanti den varios ocasion, cu nunca tabatin un esfuerso genuino pa reduci gastonan. Segun Arends, esaki a wordo confirma den varios ocasion pa Raad van Advies como tambe e colegio di supervision financiero, CAft.

 

“E posicion di salida di e gabinete actual tabata hopi bentahoso den cuadro di finansa publico cu un espacio financiero tambe di mas o menos 300 miyon florin pa por fia y gasta mas. Ademas di esaki e entradanan adicional di e aumento di impuesto cu a genera 250 miyon pa elimina un debe nacional di 90% cu nunca a existi,” Parlamentario Arends a conclui. “Despues di tanto atraso a aproba e cuentanan anual di Gabinete Mike Eman II dunando desacarga administrativo.”