Home » Hamber a pone dos adicto bay horta den un bar pa haya placa

Hamber a pone dos adicto bay horta den un bar pa haya placa

by Admin
0 comment 81 views

 

ORANJESTAD – E homber L.L. y muher D.K. a admiti di a horta na un bar y cu a haci esaki pa motibo di hamber.

Aruba Native por a compronde cu Fiscal a acusa L.L. y D.K. di ta complice di a horta for di un bar riba 17 Juli 2020. L.L. a admiti di a horta hunto cu D.K. Ta asina cu D.K. a admiti y cu nan a bay cu un caha di placa y tabatin 600 florin aden y no 2600 florin manera e doño ta bisa. El a bisa cu door di Covid nan no tabatin entrada y nan tabatin hamber. Nan tabata laba auto pero door di toque de queda no por haci nada. El a bisa cu Samba tambe tabata sera y no por a haya cuminda. Nan a habri e porta di e bar y coy e caha di placa y core bay. Nan a horta pa asina tin placa pa por cumpra cuminda.

Hues a mustra cu D.K. ta un adicto di droga y ta biba riba caya. Segun D.K. e kier cambia su bida y su famia lo bay hib’e Centro Colorado. Hues a bisa cu e tin carchi castigo largo. Ta asina cu na Juni 2020 a condena D.K. na 8 luna pa ladronicia y ni un luna despues cu el a sali for di KIA, e ta cay sera atrobe pa ladronicia.

Ta asina cu L.L. ta anda cu D.K. riba caya y ta D.K. a bin cu idea pa bay horta. Segun raport di Reclasering, L.L. ta riba caya y ta adicto na piedra. E ta biba serca su mayornan. Na 2012. L.L. tabata bou guia di psychiater y hasta mester a bay obligatorio CDM. Esaki a causa cu L.L. a drecha. Pero despues di a sali na 2018, el a bolbe cay den droga.

Hues a mustra cu Reclasering ta dispuesto pa guia L.L. pasobra nan ta mira cu L.L. lo por cambia su bida.   

Fiscal ta haya legalmente proba e ladronicia. Ambos a admiti di a horta for di e bar. Na opinion di Fiscal, e hortamento ta un molester pa hopi hende cu si ta traha pa por yega na placa. El a tuma nan na malo. Mirando cu recien D.K. tabata sera, Fiscal a exigi 12 luna di prison. Fiscal ta haya cu mester manda señal bon cla cu no ta permiti esaki. Pa L.L., Fiscal a exigi 12 luna di prison di cual 6 luna ta condicional y 2 aña di prueba y bou guia di Reclasering.

Hues a dicta sentencia di biaha. Hues ta haya legalmente proba cu riba 17 Juli 2020 nan a horta den un bar. Ambos ta residivista. Na opinion di Hues, ladronicia ta hopi molestioso pa hendenan. Hues a condena D.K. na 10 luna di prison. Pa L.L., Hues a bisa cu ta diferente y cu e por haya ayudo. Hues a hala atencion di L.L. cu na dado momento tur cos ta caba y si e bolbe cay den droga lo ta otro situacion. Hues a condena L.L. na 10 luna di prison di cual 5 luna ta condicional, cu un tempo di prueba di 2 aña. Hues a ordena pa L.L. cay bao guia di Reclasering.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio