Dialuna durante e update cu Prome Minister a duna tocante e Request for Expression of Interest di Refineria di Aruba, parlamentario Alan Howell a scucha cu atencion e desaroyonan cu ta tumando luga.
Prome Minister a indica cu e comision a conseha Gobierno pa sigui cu dos candidato, uno cu ta interesa den rehabilita y opera e refineria, Quantum LLC y otro cu ta interesa den haci algo riba e area di LNG cu por asisti e refineria riba e area di energia ,pero tambe den futuro posiblemente pa loke ta trata e area di awa y coriente cu lo por baha e gastonan di awa y coriente pa henter Pais Aruba, cual ta Eagle LNG.
Howell ta indica cu awo ta sigui cu e fase di negociacion, es decir, ainda no por anuncia e miho noticia, pero toch por bisa si cu ta bon noticianan pa Aruba y en especial pa e parti pariba di nos isla. “Esaki no ta precies loke nos kier a scucha, ohala nos por a scucha cu e team lo a bin bisa cu nos ta rond cu e negociacion, pero logicamente tur e cosnan aki ta tuma tempo y pesey nos di Fraccion di POR kier a gradici e team y Prome Minister imensamente pa e inzet cu nan ta butando aworaki, pasobra nos tur sa cu e tipo di negociacionnan aki tin mester di experticio y hopi pasenshi y ohala cu poder di Dios pronto lo sucha e miho noticia”.
El a sigui bisa cu e no ta interesa pa sa cua compania ta bin, contal cu ta algo cu ta bay favorece nos pais, contal cu e ta bay trece cuponan di trabou y contal cu nos por bay dilanti den nos situacion financiero na Aruba. Alan a desea e team tur clase di exito y cu dentro di poco ohala por scucha cu sea ta 1 of 2, pero contal cu e bira algo. “Nos na Aruba ta depende riba esaki, Aruba mester di dje y muy en particular nos hendenan di pariba di brug, kendenan ta resa pa por haya un super bon noticia dentro di poco”
Siguientemente el a realisa e siguiente preguntanan:
Por a scucha cu e proyecto lo por genera alrededor di 2 mil cupo di trabou y lo kier sa si esaki ta estrictamente pa localnan of cuanto lo ta destina pa personanan di exterior? Loke kier ta cu ohala tur cupo di trabou por ta pa nos hendenan, evitando loke a ser scucha den pasado cu tabata haci lo posibel pa trece hende di afo y laga nos hendenan sin trabou.
Tambe a puntra si ta teniendo cuenta cua di e companianan aki ta dispuesto pa duna bek na comunidad, especialmente na comunidad di pariba di brug por ehempel pa yuda drecha scol, edificionan y proyectonan social.
Finalisando Alan Howell a desea e comision tur clase di exito y cu ohala cu poder di Dios dentro di poco nos pais por haya e super bon noticia cu ta yega na e parti final di e negociacion pa yuda laganos para riba nos pais atrobe, despues di e golpi di e crisis cu nos a haya.