Diabierna 4 di december 2020, Prome Minister Evelyn Wever-Croes a anuncia algun medida cu ta drenta na vigor entrante diasabra 5 di december 2020 y cu ta valido pa e proximo 2 simannan. Medidanan tactico y necesario pa por drenta e temporada di pasco y aña nobo mas trankil.
Den e ultimo dianan a mira cu e cantidad di caso nobo di Covid ta creciendo. E siman aki e averahe ta 21 caso pa dia, siman pasa e tabata 15 caso nobo pa dia y e siman prome 10 caso nobo pa dia. Pues esaki ta e motibo pa cual ta tuma algun medida pa purba frena e desaroyo aki.
Situacion:
Te cu 3 di december tabatin 145 caso activo di cual 124 ta residente y 21 ta no residente. Esaki den mas di 51.000 test cu a haci, di cual poco mas cu mita di e cantidad ta encera testnan haci na airport. Den hospital tin 9 persona di cual 2 ta den Cuido Intensivo y 7 riba sala. E cantidadnan aki, riba nan mes, por wordo maneha, pero e tendencia cu tin den e aumento ta preocupante.
P’esey, según Prome Minister, ta asina importante pa tuma accion awor, sino aki un siman lo por conoce 60 caso nobo pa dia segun calculacion di expertonan. Cual por hiba nos na e mesun situacion cu nos tabata aden na augustus cu e di dos ola di Covid. Na Augustus e situacion a escala hopi lihe, p’esey aworaki ta tuma decision pa fren’e.
Na augustus e prome siman tabatin 9 caso, e di dos siman 500 caso y e di tres siman 1100 caso, te cu el a yega 1600 caso dia 16 di september. Despues a tarda 3 luna pa nos yega rond di 100 bek. Anto esaki ta locual cu no por permiti pa bolbe pasa y ta tuma medida awor.
Medidanan
E medidanan cu ta keda introduci ta bay segun escalacion, cu e meta di frena e aumento di casonan den e siguiente dos simannan. Si den dos siman e strategia funciona, tal ves por considera pa flexibilisa algun di nan. Si e no funciona lo escala e medidanan pa algun mas severo cu ta afecta e libertad di movecion di nos ciudadanonan mas, cual ta afecta nos economia mas tambe.
Restaurant: maximo cantidad di persona na mesa ta 8 (paden) y 10 (pafo). No por balia; Mester tene distancia; Mester bisti tapaboca.
Rumshop / bar cu no ta sirbi cuminda: ta keda cera.
Encuentro social y familiar: maximo cantidad di hende 30 (paden) y 60 (pafo) si tin distancia p’e, pasobra distanciamento di 1,5 m ta keda na vigor. No por baila; Mester tene distancia; Mester bisti tapaboca.
Deporte: por continua cu medida di precaucion, pero SIN publico.
Entretenimento / banda: maximo cantidad di musico / artista 3 (paden y pafo)
Musico ta responsabel pa stop e musica si hendenan lanta balia.
Entiero: maximo cantidad di persona na mes momento ta 30. Mester tene distancia y mester tin tapaboca bisti.
Tienda / supermercado: limita na un persona pa famia, cu tur regla di precaucion. Mester tene distancia, mester bisti tapaboca.
Organisadonan cu por a haya un vergunning caba pa un evento cu no ta cumpli cu e reglanan aki, lo wordo contacta pa crisis team pa hunto yega na un solucion. Realidad ta cu e reglanan aki ta drenta na vigor mayan (5 di december). Y ta conta pa tur hende! Demas reglanan manera di trabou y scol ta keda mescos.