Home Local Exitoso Final di e Proyecto Social: “Poder di Hubentud, edicion #6.

Exitoso Final di e Proyecto Social: “Poder di Hubentud, edicion #6.

SHARE

Oranjestad,
Diasabra 28 di November 2020 na Renaissance Convention Center, a tuma luga e exitoso final di e Proyecto Social: “Poder di Hubentud, edicion #6, realisa pa Asociacion
Trabao di Hubentud na Aruba (ATHA)
Poder di Hubentud ta un proyecto social cu ta duna oportunidad na tur hoben cu ta destaca grandemente den nos comunidad pa medio di nan trabao boluntario y ademas nan ta demostra nan amor y pasion den loke nan ta haci den e oranan liber y ta keda demostra den nan trabao nan disciplina y caracter boluntario.
E hobennan aki ta profila grandemente pa nan potencial y capacidad y nan ta fungi como e futuro lidernan den nos comunidad.
E idea tras di e proyecto aki, ta pa duna un oportunidad na tur hoben cu ta destaca den diferente area manera: Social, Deporte, innovacion, tecnologia, trabao boluntario, Arte y Cultura, entre otro; pa nan por sigui desaroya nan talento y habilidadnan cu cada hoben aki ta posee y ademas e proyecto aki ta brindanan un trayecto cu un duracion di mas di 4 luna na unda nan por haya diferente guia y instruccion, ademas di ekipanan cu diferente herment hopi necesario pa nan por sigui desaroya nan mes, tanto personalmente, como profecionalmente.
Durante di e trayecto, tur hoben participante mester a crea un proyecto pa desaroya den nos comunidad y esaki ta cu e fin di sigui aporta grandemente cu nan idea y e necesidadnan cu nos tin di sigui aporta grandemente na bienestar y probecho di henter nos comunidad.
Ta di remarca cu tur proyecto mester tabata uno nobo y sigur tur proyecto cu a ser presenta tabata uno hopi balioso y exitoso y na final di dia tur participante a sali ganador, pa motibo cu ademas cu a ser selecciona e 2 proyecto cu lo ser desaroya den cada categoria den nos comunidad; tur otro participante lo continua dunando bida den diferente tarea como asistentenan cu e hobennan ganador nan a apunta.
Tur hoben participante a haya nan merecido reconocemento como “Hoben Poderoso
2020” y na final di e anochi e resultado di e ganadornan tabata lo siguiente: Joshua Tromp, Ganador Categoria Hoben 15-17 Aña y Tyfanny Garcia, Ganadora Categoria “Hoben Adulto” 18-21 aña.
E anochi tabata uno hopi exitoso y tambe a conta cu presencia di S.E Prome Minister, Sra Evelyna Wever-Croes, cu tambe a hiba palabra y a resalta e balor cu tin den e formacion di liderazgo di nos hobennan.
Tambe a conta cu representantenan di ATHA, Departamento di Cultura, dunadornan di tayer, invitadonan special, boluntarionan, hobennan boluntario di edicionnan anterior, mayornan y hobennan nominado di edicion 2020.
Masha Pabien di curason y masha danki na ATHA.
Na Directiva di ATHA y na su Directora: Sra Cyndi Kelly Mathilda.
Na tur dunado di tayer, hobennan boluntario, na Centro di Bario Ayo, na e hoben
Liandro Loopstok cu a fungi como Lider di Proyecto y na Comision Poder di Hubentud 2020; Sr Vanessa Croes, e hobennan Divianne Charlaine Koolman, Ana Milena Lugo y Sr Jhon Freddy T. Montoya representante di Departamento di Cultura Aruba.