Home Politics Pa diasabra awo 5 di december: Minister Xiomara Maduro ta invita nos...

Pa diasabra awo 5 di december: Minister Xiomara Maduro ta invita nos mucha- y mayornan pa sintonisa un programa special “Danki Sinterklaas”

SHARE

ORANJESTAD – E situacion di e pandemia a haci cu e aña aki hopi cos mester bay diferente pa asina evita aglomeracion y cumpli cu reglanan di distanciamento social impone pa Departamento di Salud Publico. Pa crea e oportunidad y trece e ambiente di fiesta di Sinterklaas, Minister di Cultura conhuntamente cu Comision Celebracion Dianan Nacional ta presenta “Danki Sinterklaas”, cual ta un programa na television special diasabra awo 5 di december, Dia cu Sinterklaas ta cumpli aña. Ta trata aki di un programa en bibo di Sinterklaas y su Pietnan y esaki lo wordo transmiti na Telearuba – Canal 23, Diario TV – Canal 48 y Facebookpage di Minister Xiomara Maduro. Tin un bunita programa hinca den otro pa asina un y tur den famia den tur seguridad disfruta di esaki. E programa ta diasabra awo y lo inicia pa 5:15 di atardi. Lo bay tin presentacion di e.o. Kerekentenchi, Sinterclub, Chazz Dancers y Piet BloBlo. Un invitacion na mayornan y nan yiunan pa sintonisa e programa special aki cual ta un regalo di Ministerio di Cultura y Comision Celebracion Dianan Nacional pa henter famia y nos muchanan en especial. E conocido locutor y animador Lyonel Dirks lo conduci e programa aki cual lo ta en bibo, tin e oportunidad pa muchanan lo por yama y video call cu Sinterklaas cu lo ta den un studio special prepara pa e ocasion aki.