ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e homber Dominicano O.H.S. biba na Aruba. Tratamento di e caso aki a sosode via video conference, caminda e acusado ta na KIA mientras cu Hues, Fiscal y abogado tabata den un sala di Corte.
Aruba Native por a compronde cu e acusacion cu Fiscal a presenta contra O.H.S. ta cu riba 13 Juli 2020, a exporta mas cu 500 gram di cocaina pa Hulanda. Hues a mustra cu segun e raport di investigacion, 13 Juli 2020, O.H.S. a hiba un caha di carton na DHL cu piezanan di auto. E intension tabata pa e caha aki wordo manda Hulanda. Ta asina cu despues DHL a laga Polis cu e cacho anti droga check tur post pa Hulanda. E cacho a reacciona riba e caha di carton. Polis a habri e caha y a haya 500 gram di cocaina scondi den un bom falso. O.H.S. a admiti di a hiba e caha di carton cu pieza pero no tabata sa cu tin cocaina den e caha.
O.H.S. a declara na Polis cu el a haci fabor na un amigo pa manda post Hulanda. E ta kere cu e persona ta un Venezolano, un tal Fernando pero no sa mas di dje. El a haya 50 florin pa haci e fabor. Hues ta haya cu O.H.S. mester a haci mas investigacion cu djis bay haci fabor.
Fiscal ta haya legalmente proba cu O.H.S. a exporta droga. Fiscal ta di opinion cu O.H.S. mester tabata sa cu tabatin droga den e caha. Na opinion di Fiscal, e hecho cu a entrega e caha na DHL pa manda Hulanda, ta wordo considera exporta. Pa cu e castigo, Fiscal a tene cuenta cu ta promer biaha cu O.H.S. a cay sera. Tambe Fiscal a tene cuenta cu circumstancia personal di O.H.S. y a exigi 15 luna di prison di cual 5 luna ta condicional cu 2 aña di prueba.
Hues a sera tratamento di e caso y a dicta sentencia di biaha. Hues ta haya O.H.S. culpable di a exporta 534 gram di cocaina. Hues a mustra cu ora O.H.S. post algo, e ta responsabel pa esaki. Hues a bisa cu droga ta un problema grandi pa Aruba. Hopi droga ta pasa via Aruba y Curacao pa bay diferente parti rond mundo. Pa cu e castigo, Hues a tene cuenta cu circumstancia di O.H.S. y a conden’e na 14 luna di prison di cual 6 luna ta condicional cu un tempo di prueba di 2 aña.