Home Corte Castigo pa homber cu a yama Parlamentario Tjon pa “pedofile”

Castigo pa homber cu a yama Parlamentario Tjon pa “pedofile”

SHARE

ORANJESTAD – Awe mainta Corte den Promer Instancia a trata e caso penal cu Ministerio Publico a cuminsa contra e homber Andre Angelo Paskel, kende ta wordo acusa cu riba 7 October 2019, riba facebook a yama Parlamentario señor Rocco Tjon pa pedofile.  

Aruba Native por a compronde cu tabatin discusion riba e libertad di expresion di hende, pero Fiscal y Hues a mustra cu tin un limite. Ambos ta haya cu A.Paskel. a surpasa e limite y cu A.Paskl ta castigabel.    

Hues a bisa cu Tjon a haci keho na Polis pasobra 7 October 2019 riba facebook durante su conferencia di prensa cu W. a pone riba su facebook page, A.Paskel. a reacciona y a yama Tjon pa pedofile. Tjon den su keho ta haya cu a tacha su bon nomber.

Fiscal ta haya legalmente proba cu A.Paskel. dia 7 October 2019 a skirbi cu Tjon ta pedofile. Fiscal a bisa Hues cu hendenan den politica ta wordo ataca y nan mester por cu ataque. Pero tin limite. E ta haya cu A.Paskel. a sorpasa e limite. Fiscal a bisa cu Ministerio Publicio ta sigui di serca expresionnan cu ta wordo haci di politiconan. El a bisa cu pa ley, e uso di e palabra pedofile ta castigabel.

Fiscal ta haya cu A.Paskel. a tacha e bon nomber di Tjon. E pregunta ta, ki castigo ta na su lugar. Na opinion di Fiscal, boet no tin sentido pasobra A.Paskel. no tin trabao. El a exigi 20 ora di trabou pa comunidad y si A.Paskel. no cumpli, e lo mester bay 10 dia sera den KIA.

Hues a sera tratamento di e caso y a dicta sentencia di biaha. Hues ta haya A.Paskel. culpable.

Hues a splica cu A.Paskel. tin libertad di expresion y cu Tjon ta un politico cu mester por contra critica. Sinembargo, tin un limite den libertad di expresion. E palabra pedofile na opinion di Hues a surpasa e limite. E palabra pedofile ta tacha e bon nomber di hende. Pedofile ta un acusacion hopi serio.  

Pa loke ta e acusacion pedofile den direccion di Tjon, Hues a mustra cu Tjon no a wordo persigui pa pedofile. E ta haya cu A.Paskel. ta culpable y a condena A.Paskel. na 20 ora di trabou pa comunidad y si e no haci esaki, e lo mester bay 10 dia sera den KIA.