Home Local Mas di 150 bari di cerbes ta forma un kerstboom Santa Claus...

Mas di 150 bari di cerbes ta forma un kerstboom Santa Claus di Coca Cola a adopta rotonde di Cumana

SHARE

ORANJESTAD – Como un forma pa duna bek na comunidad y trece ambiente di paz y felicidad riba nos isla, empleadonan di Tropical Bottling Company y Brouwerij Nacional Balashi a adopta e rotonde di Cumana riba Watty Vos Boulevard. Ey a hiba no menos cu 152 bari di cerbes Balashi, cu ta poni strategicamente di tal forma cu nan ta forma un kerstboom.

“Ta un vision cu a nace di buena fe pa trece speransa pa Aruba despues di tur locual a pasa den aña 2020”, asina Rowald Werleman di Brouwerij Nacional Balashi a indica. “Di e forma aki nos ta cera aña y cu e speransa pa otro aña por trece prosperidad den comunidad”

E barinan di cerbes bashi lo tabata destina pa hotel, casino y otro clientenan, pero debi na e situacion, lamentablemente nan a keda sin un destinacion. E ora a decidi pa uza e mesun barinan aki, pone nan na otro y bira un adorno riba rotonde di Cumana. Cu masha orguyo un grupo chikito di trahadonan local a lora manga na e rotonde y decor’e.

Ta invita henter comunidad pa ora sali keiro, pa pasa na e rotonde di Cumana y admira e trabou duro cu un grupo chikito di trahado a hinca den otro, dedica na henter comunidad di Aruba. “Hunto nos lo sali di e situacion cu nos ta aden”, asina Rowald Werleman a termina bisando.

A cuminsa produci cerbes Balashi desde 1998 caba, mientras cu na 2011 a lanza cerbes Chill riba mercado. Brouwerij Nacional Balashi ta produci cerbesnan fresco netamente Arubiano, gusta tanto pa nos localnan como tambe pa turistanan.

Tropical Bottling Company ta e distribuidor oficial di Coca-Cola desde prome cu di dos guera mundial. Coca-Cola como marca, semper a enfoca riba e union di famia, pa hunto comparti e miho momentonan, specialmente durante temporada di pasco. Coca-Cola y Tropical Bottling Company ta corda pueblo cu e aña aki, a pesar di tabata dificil, ta e cosnan chikito y momentonan den famia ta bal mas cu tur cos y cu nos tempo ta e regalo di mas bunita cu nos por regala nos sernan stima.

Coca-Cola y celebracion di pasco semper a bay man den man y e aña aki despues di hopi aña, por mira un boter di Coca-Cola 20oz edicion di pasco riba mercado. Y Tropical Bottling Company ta orguyoso cu nan refresco ta produci localmente door di nos mesun hendenan.

Como un manera pa gradici pueblo y trece un poco alegria di pasco, nan tambe a contribui na decora e rotonde cu e famoso Santa Claus di Coca-Cola.