Home Local Un colaboracion unico entre organisacionan pa restoracion di Aruba su Flora

Un colaboracion unico entre organisacionan pa restoracion di Aruba su Flora

SHARE

 ORANJESTAD, ARUBA – Ban Lanta y Planta, Stimaruba, Fundacion Parke Nacional Aruba, Universidad di Aruba y Marinierskazerne Aruba orguyosamente ta anuncia un colaboracion special unda lo planta matanan local pa asina restaura e biodiversidad di Aruba su medio ambiente.

 

E inicio di e colaboracion unico aki a tuma lugar di 27 pa 29 di november ultimo na tres diferente localidad: Universidad di Aruba, Mariniers Kazerne, y Parke Nacional Arikok. E prome parti di e colaboracion a consisti di plantamento di e Pali’sia Cora (Bursera Simaruba) cual ta un mata protegi, na tur tres sitio. Asina ta engrandese e distribucion di e especie akinan, cu ta na peliger di extincion. Adicionalmente, a logra planta alrededor di 50 palo y mata di 18 diferente especie local, incluso algun mas na peliger di extincion na Marinierskazerne den un area designa como “Park van Dasselaar”, unda lo tin un garantia di proteccion optimal y un potencial halto pa e cresemento y desaroyo di e especienan aki.

 

Palo y matanan tin varios funcion importante y esencial, sin laga afo e uso medicinal. Nan ta brinda oxigeno na nos medio ambiente y ta mehora e calidad di aire. Ademas di esaki, nan ta trese sombra y ta brinda un temperatura ambiental mas agradabel y ta reduci e “heat island effect” cual ta e causa di nos camindanan, acera y edificionan. Adicionalmente por admira e palo y matanan aki ariba nos careteranan, den diferente parkenan, lugarnan recreativo, y nos den nos cura di cas cual ta crea un ambiente trankilo y atractivo den varios barionan di nos isla. Na varios paisnan, palo y matanan bieuw ta wordo considera como uno historico cual ta trese un sentido di orguyo nacional debi na e beyesa y aparencia majestuoso cu e ta brinda. Finalmente, palo y matanan ta yuda combati cambio climatico dor di secuestra carbon di aire. 

 

Tin 352 especie di palo y mata registra na Aruba, di cual 6 di e especienan aki por solamente encontra na Aruba. Varios especie ta bou presion y nan existencia ta wordo menasa. Plantacion di palo y matanan nativo ta esencial pa restaura areanan pa nan forma orginal, restaura e structura original di e tera, crea habitat pa e fauna local y asina aumenta e biodiversidad na Aruba. Mas importante cu e plantacion di matanan nativo ta e preservacion y protecion di nos palo y matanan existente ya cu mas bieuw un palo of mata ta, mas grandi su contribucion na e salud pe ser humano.

 

Por medio di e colaboracion aki, e 5 organisacionnan ta comparti y intercambia nan conocemento y ta combina nan experencia pa proteha y preserva nos naturalesa actual, rehabilita y restaura e naturalesa cu a ser perdi durante decadas dor di actividadnan di e ser humano, informa y yega mas serca di e comunidad pa asina aumenta e aprecio pa nos flora local. Pa asina por uni den tur e esfuersonan pa conserva e biodiversidad di nos isla y hunto logra un futuro sostenibel. 

 

Durante 2021, e 5 organisacionnan tin como meta pa conhuntamente realisa:

  • Cultivo di palo y matanan nativo cu e proposito pa planta esakinan bek
  • Organisa dos evento anual pa planta mata
  • Conscientisa nos comunidad riba rednan social
  • Promove hardineria cu palo y matanan nativo
  • Promove hardineria sostenibel cu respet pa naturalesa
  • Brinda oportunidadnan educativo por medio di conferencianan y presentacionnan 

 

E organisacionnan ta mira bek na un inicio exitoso y ta sigi traha hunto pa asina fortifica e lasonan dentro di e colaboracion hunto cu e ayudo di e comunidad y voluntarionan. E organisacionan lo pone un enfoke riba promocion y plantamento di palo y matanan local cual ta beneficia e medio ambiente y biodiversidad di Aruba. 

___________________

Banda di e colaboracion entre diferente organisacionnan, cada organisacion ta brinda su propio contribucion na e conservacion di flora local, engrandece e biodiversidad y stimula comportacion sostenibel: 

 

Ban Lanta y Planta 

Ban Lanta y Planta ta un fundacion relativamente nobo cu ta traha duro pa realisa nan meta primario di cultiva y planta 10.000 mata local, incluyendo mangel. E organisacion no-gobernamental (ONG) y voluntario tambe ta dedica activamente na e conservacion di matanan y palonan existente y conscientisacion di nan importancia por medio di educacion. 

 

Stimaruba  

Stimaruba ta un di e prome ONG-nan di nos isla dedica na conservacion y proteccion di naturales, cu enfasis riba flora local y enseñansa. Stimaruba a crea mapanan di flora riba ful e isla y ta continuamente organisa caminata guia pa comparti y engrandese conocimento tocante e importancia y balor di flora local.  

 

Fundacion Parke Nacional Aruba (FPNA) 

FPNA ta un ONG professional dedica na conservacion di naturaleasa y e maneho di 16 areanan natural terestre y 4 areanan marino.  FPNA su tareanan ta encera diferente programanan di conservacion di especie, recuperacion di areanan natural y crea conscientisacion di ecosystemanan saludabel y resiliente y comportacion sostenibel, por medio di entre otro nan areanan botanico.  

 

Universidad di Aruba (UA) 

UA como parti di nan programa nobo di SISSTEM lo contribui na conservacion di naturalesa cu investigacionnan di studiante y e desaroyo di un ‘app’ di biodiversidad cu lo por identifica palo y mata na localidadnan specifico pa asina mapa y monitorea tur flora. Riba e terreno di UA tambe lo contribui na e biodiversidad local cu nan programa di planta flora local. 

 

Marinierskazerne Savaneta (MSK-SAV) 

MSK-SAV tin un rol ehemplar cu nan enfasis y ambicion pa integra sostenibilidad den nan procesonan operacional, incluso e dedicacion di areanan significante riba nan tereno pa planta flora local cu ta adapta na e calor y secura. Asina MSK-SAV ta contribui directamenta na e biodiversidad di flora. Tambe nan ta brinda proteccion na diferente shoco, nos parha endemico protehi y simbolo nacional, cu ta biba y broei riba nan tereno.