Home Dutch Kingdom BONEIRU RIBA LISTA DI NASHONNAN UNÍ

BONEIRU RIBA LISTA DI NASHONNAN UNÍ

SHARE

A kuminsá ku un trayekto nobo pa logra ku Boneiru ta bai riba e lista di Nashonnan Uní di teritorionan sin gobernashon propio. Djabièrnè último, Fundashon Nos Ke Boneiru Bèk ofisialmente a lansa e proyekto aki ku ta kai bou di un komité ehekutivo ku ta konsistí di diferente partido. Durante un rueda di prensa virtual na Captain’s Don Habitat, presidente di e fundashon James Finies a presentá resultado di un estudio titulá ‘Bonaire Assessment on Self-Governance 2020’ ku ta base di e proyekto. Tambe Finies a persenta e miembronan di e komité ehekutivo. E últimonan aki ta Aljano Emerenciana di 1 Union pa Pueblo, Suzy Thodé di Union Revolushon Boneriano, Robby Beukenboom di Frente Sosial Progresivo, Davika Bissessar di Bonaire Human Rights Organization, Sedney Marten komo siudadano i Finies mes komo presidente di Fundashon Nos Ke Boneiru Bèk. Djabièrnè a firma un deklarashon pa ofisialisá e koperashon. 

 

IMPORTANSIA

Segun Finies, e evento di djabièrnè ta hopi importante. “Si Boneiru bai riba e lista, esaki lo ta na mes nivel ku abolishon di sklabitut i firmamentu di Hulanda di e tratado na 1945 na fin di guera mundial pa duna e derecho pa ta antiano. Awe nos ta dal un stap pa nos bai buska nos derechonan na Nashonnan Uní. Pa Boneiru nos ta bai buska esaki, i nos ta desidido pa hasi esaki.

“Nos a traha riba esaki pa dos aña largu, kaminda hendenan a koperá ku $1, $2, $10, tin a duna $100 i hasta mas, tambe na Kòrsou i Aruba. Tur a kontribuí pa logra e estudio akí. Esaki ta di Boneiru i pa Boneiru.”

 

E ESTUDIO

Tokante e estudio ku a kulminá den e rapòrt ‘Bonaire Assessment on Self-Governance 2020’, Finies a splika ku esaki ta na nivel di Nashonnan Uní. E ta na enkargo tambe di mesun grupo di eksperto ku a traha un rapòrt igual pa Polunesia Franses ku a pone ku e pais aki bai riba e lista di Nashonnan Uní. Finies: “E rapòrt aki ta prueba kon e relashon ta entre Boneiru i Hulanda i lo ta e salbashon pa e isla aki den e añanan ku ta bini. Nos derechonan ta ankrá mas haltu ku na Boneiru i so i na Hulanda. Nos derechonan ta na nivel mundial. E rapòrt ta e hèrmènt mas prinsipal riba nos trayektoria pa bai riba e lista di Nashonnan Uní. 

Segun Finies, no nesesariamente mester di gobièrnu di Boneiru ni gobièrnu di Hulanda pa yega riba e lista. 

Dr. Carlyle Corbin fundadó i analista prinsipal di The Global Dependency Studies Project ku a hasi e investigashon pa Boneiru a splika e proseso ku nan a hiba. Tambe e indikadónan ku nan a usa i a suprayá e konklushonnan prinsipal. Corbin: “E assessment ta un mekanismo independiente pa invesigá e relashon di poder entre un hurisdikshon polítiko i un otro pais ku e tin un relashon polítiko kuné. Intenshon di e assessment entre otro ta pa determiná ku e areglonan di gobernashon ta kuadra ku standartnan internashonal pa igualdat polítiko kompleto nesesario pa gobernashon propio kompleto bou di lei internashonal.” 

 

KOMITE EHEKUTIVO 

Formashon di un komité ehekutivo ta e siguiente paso pa yega riba e lista di Nashonnan Uní, segun Finies.  Miembronan di e komishon ta representantenan di partidonan ku no ta den gobièrnu i ku den pasado a koperá ku Nos Ke Boneiru Bèk. 

Djabièrnè, Aljano Emereniana di 1 Union pa Pueblo a bisa ku den pasado, el a para pa Laso Direkto, pero ku el a hasi esaki a base di malinformashon. El a konfirmá su sosten na e lucha di Finies i a bisa ku e lista di paisnan sin propio gobernashon ta un bon yudansa pa e lucha. 

Suzy Thodé di Union Revolushon Boneriano tambe a mustra riba e importansia di union i ku e ta na fabor di kambio. Esaki pasobra e struktura estatal ku Boneiru ta den, no ta bon. 

Robby Beukenboom di Frente Sosial Progresivo a mustra riba e importansia di union. Tambe riba e importansia stratégiko di bai riba e lista di Nashonnan Uní. Ku konvikshon el a firma pa Boneiru subi e lista pasobra e ta kere ku e raportamentu obligatorio di parti di Hulanda na Nashonnan Uní lo hasi un diferensia grandi.  

 

SOSTEN

Djabièrnè atardi Fundashon Nos Ke Boneiru Bèk a haña sosten di diferente persona pafó di Boneiru. Via video nan a duna nan mensahe di sosten. Nel Janga di Club Boneriano na Kòrsou a trese dilanti ku e ta preokupá ku e situashon na Boneiru i ku no ta e isla aki a skohe pa e relashon ku e ta den. 

Ben Whiteman di Pueblo Soberano di Kòrsou a mustra riba e problema ku el a yama ‘défisit demokrátiko’. Esaki ta nifiká ku semper Hulanda ta den mayoria den tumamentu di desishon. Whiteman: “E úniko manera ta si bo kana via un órgano independiente i den e kaso aki, unu ku Hulanda ta un di su kofundadónan ku ta Nashonnan Uní. Si nada no sosodé, futuro di bonerianonan lo ta hopi skur. Boneiru lo bira un paraiso pa hulandesnan oropeo, anto e boneriano tin mag di sirbi nan.”

Eks minister di hustisia di Aruba i vice presidente di Copal Rudy Croes a mustra ku e situashon di Boneiru ta yen’é ku tristesa. Croes: “Tur hende tin kulpabilidat ku a yega asina leu. Pa nos ta un bèrgwensa ku nos a pèrmití pa Hulanda abusá di nos rumannan na Boneiru. Ta un bon paso ku Nos Ke Boneiru Bèk ta bai riba e lista Nashonnan Uní.”