Watty Vos Boulevard/Rotonde Bushiri – Diasabra anochi 11’or pasa polis ta haya informacion di un accidente serio ariba rotonde di Bushiri cu ta conecta ariba Watty Vos Boulevard.
E prome informacionnan tawata bisa cu lo tin varios persona seriamente herida.
Patruyanan cu tawata cerca mesora a yega y ta confirma loke a wordo bisa na Central di Polis.
Ta pidi pa ambulance cu urgencia, debi cu e chauffeur segun polis e tawata tin pulso, pero esaki lo ta swak.
Dos unidad di Brandweer a yega na e sitio, debi cu tambe a ser menciona cu e personan lo ta pega den e auto.
A resulta cu esaki no tawata berdad, pero si bomberonan a keda na e sitio pa duna un man unda cu mester.
Na yegada Paramediconan nan no por a haci nada mas pa e dama chauffeur(24) debi cu e lo a fayece al instante.
Loke a sosode
E vehiculo tawata un Hyundai Accent, cu cuatro turista den dje, tres dama y un cabayero.
Por a mira claramento cu e auto tawata bayendo direccion rotonde Bushiri.
Pero kizas no conoce e caminda y ariba dje e caminda tawata muha door cu awa a caba di yobe, e chauffeur lo a trata di evita un impacto door di cera brake.
Asina mes kizas velocidad halto y caminda muha a pone cu e auto a sigui slip y bay dal contra e mura di e rotonde, cu a causa e morto di e chauffeur.
Pa 12:15 a.m Dr.Texier a constata morto di e dama turista Mericano K.C di 24 aña di edad.
E otro tresnan a bay Hospital y segun informacion policial nan situacion ta stabil.
Slachtofferhulp tambe a presenta y lo a bay Hospital pa atende e tresnan cu sobrevivi.
Esaki ta bira e di 6 morto den trafico pa 2020.
