Oranjestad – Diasabra anochi nos a trece dilanti cu un team di recherche di lo tawata buscando algo di interes na un adres situa na Nuñe. E momento eynan no tawata mucho duidelijk kiko exactamente. Pero si nos por a muri cu tawata trata di Atraco Team.
Diadomingo mainta Cuerpo Policial a confirma loke nos a trece diasabra anochi, cu e investigacion tawata tin di haber cu un of mas atraco. Aki ta sigui e relato ricibi di parti polis.
“Atracoteam a detene grupo cu tabata planeando un atraco.
Awe mainta y durante siman cu a pasa Atracoteam tawatin diferente entradanan hudicial entre otro na dos cas den bario na Parkietenbos i Nuñe.
E sospechosonan deteni ta di inicialnan:
Y.M.Z.L., W.J.V.R., J.C.F.A., R.A.B.E., A.M.M.M., A.G.R.R.E.
Edadnan di e 6 sospechosonan ta varea di 22 pa 36 aña y tur ta di nacionalidad Venezolano.
Durante un di e entradanan hudicial a confisca un revolver.
Cu detencionnan aki atracoteam ta soluciona 4 caso di atraco cu a tuma luga den lunanan di Mei, September y November.
Mirando cu nan tawata planeando un otro atraco no por a risca y ministerio publico a opta pa duna orden pa detene e sospechosonan aki.
Mester bisa cu e personanan deteni ta wordo considera sumamente peligroso y ta pesey a hasi uso di e team di aresto y otro departamentonan special di Cuerpo Policial.
No ta descarta cu mas detencion lo cay.
Pa Cuerpo Policial por resolve mas caso cu cooperacion di e pueblo di Aruba. Esaki ta hopi importante pesey nos ta pidi si bo tin cualkier informacion jama nos tiplijn: 11141”.