Home Local Famianan cu ta bay ricibi bishita di afor na cas, sea alerta...

Famianan cu ta bay ricibi bishita di afor na cas, sea alerta y prepara.

SHARE

Oranjestad 27 di november – Frontera cu latino America pronto lo habri, hopi famia aki na Aruba lo por ricibi bishita di algun familiar of amistadnan di exterior. Den hopi caso e bishita di exterior lo por bay hospeda na nan cas. Sinembargo Crisis Team di Covid -19 di Gobierno di Aruba, ta urgi e famianan aki pa tuma contacto cu nan familiar of amistadnan cu ta bay biaha di Latino America pa Aruba, pa corda nan pa haci e PCR test di Covid-19 72 ora promer cu nan vuelo y pa nan upload esaki na momento di yena nan ED card. Si e test sali negativo mes, ta urgi e famianan pa keda alerta pa cualkier sintoma cu e persona por haya durante e promer dianan.
Den caso cu desaroya sintoma, e persona mester bay di biaha den isolacion den un camber na e cas y yama dokter di e famia. Pa esnan cu tin idea di biaha pa Colombia, tin informacion importante cu nan mester ta na altura di dje; actualmente Colombia tambe ta exigi un test PCR negativo 72 ora prome cu biaha y despues di yegada mester bay 14 dia den cuarentena. Comision di Crisis di Covid-19 ta spera cu e informacion suministra por yuda den prevencion y plamento di e virus. Awendia hopi caso ta sosodiendo caminda personanan cu nan no sa cu nan tin e virus (asintomatico) ta pega otronan cu ne, pesey ta asina importante pa tuma tur medida necesario y pone e reglanan di higiena y distancia den practica cu hopi disciplina.