Home » Cu yudansa di FIFA ta sigui yuda futbol AVB a entrega un pakete di alivio na clubnan

Cu yudansa di FIFA ta sigui yuda futbol AVB a entrega un pakete di alivio na clubnan

by Admin
0 comment 76 views

 

 

ORANJESTAD, Aruba –  Despues cu FIFA a constata cu e Pandemia lo tin su efectonan negativo financieramente ariba e funcionamento di e federacionan miembro, el a tuma e decision di pone fondonan disponibel pa sostene federacionnan y clubnan miembro di federacion. Tur federacion miembro mester a traha un pakete y manda un peticion pa FIFA pa aprobacion pa por ricibi e fondonan. Directiva di AVB tambe a analisa e situacion na Aruba y di kico lo bay ta e impacto ariba e clubnan miembro y asina a dicidi cu lo presenta un pakete cu ta consisti di 6 area caminda lo duna ayudo. Despues cu FIFA a revisa e peticion di AVB, esaki a keda aproba di biaha, basa ariba e 6 areanan cu lo duna ayudo.

 

Despues cu FIFA a aproba e peticion di AVB y a tranferi e fondonan, AVB a ser informa cu pa por ofrece e ayudo, mester tin actividadnan na e clubnan ta tumando luga. Pues AVB mester a warda e momento cu gobierno a duna luz berde pa e clubnan por a inicia cu nan actividadnan y por cuminsa cu entrenamentonan prome cu a bay over na reparti e materialnan.

 

A organisa e actividad pa haci entrega den consulta cu esunnan responsible, -IBiSA y DVG. Mester a haya e permiso pa por a organisa e evento aki, unda nos mester a tene cuenta cu e reglanan existente. Esaki tabata un momento sumamente importante p’e clubnan, door di ta den preparacion pa reactiva e actividadnan di futbol y e clubnan a ricibi materialnan por ehempel bala, hashes, pion, net.

 

Pocopoco nos ta duna nan e sosten p’e clubnan por sobrevivi retonan cu ta bay bin. E reto lo ta grandi, FIFA a premira esaki. Hunto cu e federacionnan a haci un sondeo unda e dolornan di mas grandi lo ta. Pa Aruba esaki lo ta den areanan di uniform, gastonan operacional, mantencion di tereno, compensacion pa cierto coachnan.

 

Ing. Richard Dijkhoff, presidente di AVB, a expresa cu e yudansa aki lo ta pa dos aña y e clubnan no lo tin preocupacion por ehempel pa uniform. Ya cu nos ta bay percura pa haya esaki pa dos campeonato. Ora ta papia di operational cost, nos ta referi na sosten financiero pa cubri gastonan di coriente y awa, pero tambe relaciona cu COVID-19, gastonan comun manera mantencion di tereno esta limpiesa den tereno. Cu e ayudo aki e clubnan lo tin mas espacio pa por atende e otro retonan.

 

Ta den combersacion cu Minister di Deporte pa mira si por haya cooperacion di departamento di gobierno, esta DOW, p’e mecanismo grandi cu tin y duna sosten. Presidente di e federacion ta pensa cu no tur ora placa ta haci e cos, pero tambe e parti operacional. Hunto ta purba reactiva futbol y e ta bay bon. Un 95% di e clubnan tabata presente, por a mira e entusiasmo y di ta gradici. Esaki a duna nos e oportunidad di trece cierto informacion relevante di cambionan di e federacion cu ta na caminda.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio