ORANJESTAD – Corte den Promer Instancia a trata e caso penal cu Ministerio Publico a cuminsa contra e homber S.L. y e muher J.M. Nan ta wordo acusa cu riba 6 Augustus 2020 a exporta cocaina.
Aruba Native por a compronde cu e pareha aki a wordo deteni na aeropuerto. Ta asina cu J.M. a caba di haya yiu y tabata dunando e baby pecho. En total ta algo mas cu 1.6 kilo di cocaina a keda confisca.
Tratamento di e caso aki a sosode via video conference, caminda Hues, Fiscal y abogado tabata den un sala den edificio di Corte mientras cu e dos acusadonan tabata den un cuarto na KIA, hunto cu e traductor di Corte y miembronan di seguridad.
Fiscal a acusa nan cu dia 6 Augustus 2020, nan a wordo gara na aeropuerto cu algo mas di 1.6 kilo di cocaina. Nan intension tabata pa viaha pa Miami. S.L. a guli 33 bolita cu ta algo mas di 600 gram di cocaina. J.M. tabatin 2 cilinder y 52 bolita cu ta algo mas cu 1060 gram di cocaina na su curpa. Ambos a admiti cu nan tabata hibando e droga Miami.
Segun S.L. door di necesidad di placa el a haci esaki. El a bisa cu su yiu a haci aña y e no tabatin placa pa cumpra regalo. Door di desesperacion cu no tin placa pa cubri gastonan di mantene famia, el a haci esey. E tabata traha na un hotel y door di Covid a perde su trabao na Maart 2020.
Ta asina cu J.M. recien a haya baby y hasta tabata duna e baby pecho ora cu el a wordo deteni. El a splica Hues cu el a sufri accidente cu auto di su mama y e gastonan ta mas cu 60 mil florin. Ainda su mama no tin auto y e mester paga tur cos. E tin dos yiu y ta soltera. Tur e presion aki a pone cu el a dicidi pa bay transporta droga. E tabata trahando como accountant na un hotel y door di e sucedido aki a wordo kita.
Fiscal a bisa cu e ta haya legalmente proba cu e pareha aki a transporta droga. Nan ta complice di exporta cocaina. Fiscal a tuma nan na malo cu nan a pensa solamente riba e placa cu nan por gana. Fiscal ta haya cu mester manda señal bon cla pa esnan den necesidad pa no bay transporta droga. E ta haya cu S.L. tin e rol di coordinador. Fiscal a exigi 20 luna di prison pa S.L. y 16 luna di prison pa J.M.
Hues a sera tratamento di e caso y a dicta sentencia di biaha. Hues ta haya legalmente proba cu nan a transporta y exporta cocaina. Hues ta comparti punto di bista di Fiscal cu ta traficacion internacional y intencional nan a dicidi di hiba droga. A planea esaki adelanta. Hues a bisa cu ta hopi hende ta confronta problema financiero actualmente y transporta droga no ta e solucion. Hues a condena S.L. y J.M. na 2 aña di prison di cual 1 aña ta condicional cu nu tempo di prueba di 2 aña.