E noticia di fayecimento di Diego Maradona a consecuencia di un paro cardiaco, tawata un shock pa e pueblo Argentino. Aunke Maradona tawata recuperando di un operacion na cual ela wordo someti comienzo di luna, su morto toch a bin di forma inespera.
Social media a yena cu postnan emocional y tristo. Pero tambe cu palabranan di gradicimento pa e leyenda di futbol. Presidente Argentino, Alberto Fernández, a skirbi ariba Twitter: „Bo a hiba nos na e top di mundo, bo a haci nos intensamente felis. Bo tawata esun di mas grandi. Danki pa bo existencia, Diego. Nos lo bai sinti bo falta.”
Maradona a haci su mes inmortal durante e campeonato mundial di futbol di 1986 cu su afamado ‘mano de Dios’. E anotacion aki a permiti Argentinia gana e cuarto final pa despues gana e titulo mundial.
Pero maske cu na su pais e tawata wordo mira como un dios, Maradona tawata un persona controversial. E tawata adicto na alcohol y cocaina.Toch esaki tawata hacie humano y el a keda un persona popular, maske e mes kizas no tawata convenci di esaki. Un aña pasa, ariba su di 60 cumpleaños el a duna su ultimo entrevista na e revista Argentino Clarín. Den e entrevista ey el a puntra su mes, si ainda e hendenan lo tawata stime manera antes.
E reaccionnan despues di su morto ta proba cu su preocupacion tawata innecesario. Futbolista Lionel Messi, kende actualmente ta wordo mira door di hopi hende como e mihor futbolista di mundo, a skirbi ariba Instagram: “Awe ta un dia hopi tristo pa tur Argentino y tambe pa e mundo di futbol. El a despedi di nos, pero e no lo laga nos nunca, pasobra Diego ta eterno.”
Tambe na e pais bisiña Brazil, e reaccionnan tawata basta emocional. Maradona su rival eterno, Pele, a skirbi ariba Twitter: “Mi a perde un amigo, y henter mundo a perde un leyenda. Mi ta spera cu un dia nos lo por hunga un wega di futbol hunto den shelo.”
Ta un hecho cu Argentina ta preparando un despedida grandioso pa Maradona. Pero con exactamente esaki lo bai, ainda ta desconoci. Presidente Fernández a bisa cu e lo pone e palacio presidencial disponibel pa e despedida oficial. Tambe a anuncia tres dia di luto nacional.
Na e ciudad Italiano di Napoli, fans di Maradona a sali masalmente ariba caya diaranson anochi, pa honra e leyenda di futbol.