Home » MundoNobo den wowo di nos hobennan

MundoNobo den wowo di nos hobennan

by Admin
0 comment 38 views

Recientemente a tuma luga na nivel di Reino un iniciativa a base di un expresion di  Minister President di Hulanda, Sr. Mark Rutte, kende a vocifera cu ta su opinion cu Gobiernonan di tur e paisnan den Reino mester scucha mas e bos y opinion di hobennan di nan respectivo paisnan.

Esaki a haci cu UNICEF Hulanda a crea e proyecto #MyNewWorld, #MiMundoNobo. A organisa #MiMundoNobo na Hulanda, Corsou, Boneiro, St. Maarten, St. Eustatius, Saba y Aruba. Y na Aruba, Unicef Hulanda a acerca Fundacion Telefon pa Hubentud pa presidi y realisa e proyecto aki.

#MiMundoNobo a inicia riba 17 di october ultimo. Na Aruba a selecta 8 hoben di entre 14 pa 18 aña cu ta bishita scol secundario pa participa den e proyecto aki. Ta trata di 4 hoben masculino y 4 femenino. Nan ta bin di diferente districto di Aruba y for di  diferente etnicidad. E hobenan cu a duna nan aporte na #MiMundoNobo ta: Ariany de Weever, Daniel Jones, Giovanna Carisal, Loui-Angelo Bislick, Jean Croes, Jordan Peterson, Shaneidee Rosaria y Sherona Manuela.

Primeramente e hobennan a bin hunto riba 17 di october pa combersa tocante e retonan cu den nan opinion Aruba ta enfrentando. 

Despues riba 24 di october nan a delibera riba posibel solucionnan pa e retonan cu nan ta mira. 

Despues e hobennan a ricibi training di debate como preparacion pa un debate contra hobenan di Boneiro y Corsou. Riba 20 di november, dia Nacional y Internacional di Derecho di Mucha, e hobennan a debati virtualmente for di e studio di Telearuba contra hobenan di nos islanan ruman tocante diferente ponencia. 

 

24 di november ultimo, Minister President di Aruba Evelyn Wever- Croes conhuntamente cu Minister di Asuntonan Social y Labor, Sr. Glenbert Croes a ricibi e hobennan aki. Durante e encuentro den e sala di Conseho di Minister e hobennan por a dialoga cu Minister President y Minister di Asunto Social y Labor riba e puntonan menciona den nan rapport. Fundacion Telefon pa Hubentud Aruba a percura pa Unicef Hulanda ricibi e informacion aki, cu a keda incorpora den un rapport final. Tanto Minister President como Minister di Asunto Social y Labor tabata sumamente impresiona cu e vision di e hobennan aki . Manera Minister Glenbert Croes a expresa: e hobennan aki ta e generacion di ‘gamechangers’, e futuro lidernan di Aruba cu lo hiba nos pais e proximo nivel.

Pa e hobennan e tabata un honor di por a participa na #MiMundoNobo y contribui na e vision di loke Minister Glenbert Croes ta yama #NosArubaNobo. Minister President como Minister Glenbert Croes a gradici nan enormemente pa nan contribucion na e rapport y di a comparti nan vision cu Gobierno di Aruba.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio