Home Local Donacion Empleadonan Gabinete di Gobernador di Aruba na Fundacion Ban Uni Man...

Donacion Empleadonan Gabinete di Gobernador di Aruba na Fundacion Ban Uni Man Pa Cria Nos Muchanan

SHARE

Riba diabierna 20 di november 2020, Dia Internacional di Derecho di Mucha, e empleadonan di Gabinete di Gobernador di Aruba a haci un donacion na Fundacion Ban Uni Man Pa Cria Nos Muchanan. E fundacion aki, for di tres diferente cushina, ta prepara desayuno na scol pa mas di 630 alumno cu no por haya esaki for di cas.

E placa di e donacion originalmente tabata destina pa un evento pa e empleadonan di Gabinete, cu a cancela e aña aki pa motibo di corona. Pa toch uza e placa cu a spaar na un manera balioso, a scoge pa e donacion di un solo biaha aki. E empleadonan di e Gabinete ta haya e fundacion aki importante como cu enseñansa ta un derecho fundamental di cada mucha, mescos cu cuminda y cos di bebe saludabel. Pa por siña bon na scol, bon alimentacion ta esencial.

Walter Maduro, cu for di 1986 ta traha na Gabinete di Gobernador di Aruba, na nomber di tur empleado a haci entrega di e cheque na Rachelle Roos (Secretaria) y John Fun (Presidente) di Fundacion Ban Uni Man Pa Cria Nos Muchanan.