Home Politics Sesion brainstorming di AVP cu mundo di enseñanza

Sesion brainstorming di AVP cu mundo di enseñanza

SHARE

ORANJESTAD – Diahuebs anochi a tuma luga e di cinco edicion di Sesion di Brainstorming ‘Scucha, Pensa, Recupera Miho’ organisa pa Partido di Pueblo Arubano (AVP). Mescos cu esnan anterior, e encuentro a tuma luga den Renaissance Convention Center caminda e stakeholders ta bini hunto y ta haci presentacion na un delegacion di e partido, cu na su luga por haci pregunta. Di e manera aki ta yega na un dialogo cu tin como meta pa prepara e puntonan di un plan di maneho cu ta cana den coordinacion cu e Metanan di Desaroyo Sostenibel (SDGs) fiha pa Nacionnan Uni. Na e oportunidad aki, e enfoke tabata pone riba sector di Enseñanza, y como tal, e participantenan tabata bin for di diferente organisacion riba nos isla.

E apertura oficial tabata den man di lider di partido mr. Mike Eman, kende a yama tur hende bon bini y a gradici pa nan presencia y boluntad di aporta cu nan informacion. Tambe a tuma un momento pa recorda y dedica e anochi na ex candidato y Minister di Enseñanza, Sra. Mary Wever-Lacle (dfm).

E prome panelista tabata Sr. Randall Croes, Stichting Protestants Christelijk Onderwijs Aruba (SPCOA), kende a splica tocante nan plannan andando pa amplia e scol cu klasnan di HAVO. Tambe a expresa deseo di por yega na un operacion mas sostenibel pa inversion di contribucion den mehoracion academico. Croes tabata e prome pa menciona tambe e falta cu tin di docente, agrava pa ‘vergrijzing’ y cu Pais Aruba no ta reconoce diploma di otro paisnan di habla Hulandes manera Surinam, por ehempel.

Siguientemente Sr. Calix Ashby, como President di Stichting Onderwijs van de Advent Zending Aruba y di Aruba Adventist Academy a duna un splicacion di nan scol cu ta basa riba e sistema di Enseñanza conoci como K12. Di e mesun forma e otro panelistanan tambe a haci un introduccion di nan respectivo scol. Ta trata aki di Sra. Mariana Jimenez, conrector di Colegio Arubano, Sra. Vanessa van der Veldt di International School of Aruba (ISA), Sra. Inge La Haye di Stichting Onderwijs Combina (De Schakel) y Sra. Jasmin Tromp y Sra. Endrah Richardson-Gumbs di Colegio San Nicolas.

Comun entre tur e panelistanan tabata e realidad cu yegada di pandemia a bruha henter e ritmo di studio cu tanto alumno como docentenan tabata custuma na dje. A logra adapta rapidamente danki na hopi dedicacion y perseverancia di parti di e profesionalnan, pero cu a bay na costo di nan bienestar fisico y mental. Esaki a hiba na e realisacion cu no ta existi un sistema di apoyo pa docentenan. Esaki ta un punto cu Sra. Josephine Martilia- Albertus como president di Sindicato di Maestronan di Aruba (SIMAR) kende tambe tawata tey presente a sostene plenamente.

Otro puntonan cu a bin dilanti ta e falta di internet di velocidad halto riba e isla, y con hopi famia no tin e recursonan pa percura cu cada mucha tin e computer of laptop cu e tin mester pa por cumpli cu lesnan for di cas. Acuerdo firma entre Gabinete Wever-Croes y Den Haag tambe ta un preocupacion pa esnan den tereno di Enseñanza ya cu ta papia di evaluacion di desempeño y mas recorte den presupuesto.

E delegacion di AVP, consistiendo di mr. Mike Eman, Sra. Jennifer Arends-Reyes, mr. Gerlien Croes, Sr. Marlon Sneek y drs. Rene Herde tabatin diferente pregunta pa e panelistanan. Den e simannan nos dilanti, e sesionnan di brainstorming aki lo continua pa toca otro aspectonan cu ta di importancia pa un comunidad saludabel y stabil.