Home Politics Pa celebra Dia Internacional di Mucha: Minister Glenbert Croes a bishita diferente...

Pa celebra Dia Internacional di Mucha: Minister Glenbert Croes a bishita diferente scol y crèchenan

SHARE

Aruba ta bon conoci cu e hecho cu e titular di Asunto Social y Labor, Minister Glenbert Croes a bin ta ehecuta un maneho unda cu e ser humano, principalmente nos muchanan ta central y e punto di salida den cualkier decision cu ta regarda su responsabilidad. Despues di e sacudi cu Aruba a haya cu e perdida di e dos angelitonan, e mandatario a hacie su mision pa esaki no ripita nunca mas.
Apesar di e limitacionan cu COVID a trece cu ne, Minister Glenbert Croes, acompaña pa Rochi Geerman y Stephanie Croes, a bishita Sint Michaël School na San Nicolas, Colegio San Hose na Santa Cruz y Pastoor Kranwinkel na Paradera, Faith Revival Schoolna Rooi Afo , Butterfly Day Care, Curason Contento Peuterschool, De Schatkist Peuterschool y finalmente Kinderhuis Imeldahof na Noord. Muchanan a ricibi un atencion for di e mandatario den forma di un ‘bookmark’ y un appel pa conmemora e dia.
Minister Glenbert a hiba un palabra breve tocante e importancia di derechonan di mucha y a accentua e gratitud cu e tin pa cada un, como tambe pa nos docente- y cabesantenan di scol, cu ademas di ta docente ta un partner importante den siguridad di nos criaturanan.
E ‘bookmark’ y e appel:
E appel ta un simbolo conoci universalmente como un simbolo cu ta representa educacion. (appel di oro)
E appel cu e muchanan a ricibi, ta representa educacion cu enfoke special riba e importancia di Dia Internacional di Derecho di Mucha. Adicionalmente e appel ta simbolicamente representa salud: Un appel pa dia ta tene bo riba pia.
Texto riba e bookmark cu mas di 7oo mucha a ricibi diahuebs ultimo for di e mandatario ta bisa textualmente: “Como mucha mi tin derecho di crece y purba logra loke cu mi kier. Durante mi aventura di bida mi ta siña e diferencia entre bon y malo , pa despues mi uza mi experiencia pa forma ken mi kier ta”.
Esey ta e mensahe cu e mandatario a laga atras pa nos muchanan cu e speransa cu e gesto chikito aki por tin un impacto positivo den nan bida.
Adicionalmente, tur aña mundo ta conmemora Dia Internacional di Mucha cu e adopcion di e declaracion universal di e derechonan di mucha di aña 1959.
Aruba tambe a firma e tratado aki na aña 2001.
Den e tratado di derechonan di mucha di “United Nations”, tin palabracionan describi con paisnan mester anda cu mucha- y hobenan. Tambe kico tur nan tin derecho ariba dje.
Pa mas informacion tocante derechonan di mucha bishita: http://derechodimucha.org/mi-derecho/
Ta keda na cada un di nos pa respeta y fortalece derecho di nos criaturanan.

Feliz dia di Mucha