Home Local Ganadornan a ricibi nan premio di Concurso di Pinta & Kleur

Ganadornan a ricibi nan premio di Concurso di Pinta & Kleur

SHARE

ORANJESTAD – Diabierna ultimo, 20 di november, riba Dia Internacional di Derecho di Mucha, e comision di accion di Plan Nacional Ley di Cacho di Ministerio di Asutonan General a duna premio na e muchanan cu a gana cu nan arte den e Concurso di Pinta & Kleur cu tema cuido di mascota. E comision a ricibi mas cu 500 formulario di participacion, cu ta nifica cu e miembronan di hurado tabatin un tarea hopi dificil.

E muchanan mester a kleur ambos banda di e formulario y pinta nan mascota favorito.
E number 1 te 7 di e 28 muchanan cu a bini Bestuurskantoor diabierna pa ricibi nan premio segun nan categoria ta: Riddhi Vanjani, Jayline Caceres, Victoria Bellesteros, Xilah Kock, Cathy Cuello Matos, Xiarrah Winklaar, Sabine de Cuba (kleuter), Liv Aponte, Akyrah Delgado, Noah Orman, Zyzhia Danje, Padma Piar, Aranza Trimon, Léanne Mejia (1e klas); Faye Franca, D’Sheila Milan, Chloë Enser, Isabella Gomez, Lisa de Kort, Silviënny Gonzalez, Richinelda de Jongh (2e klas); Daisyree Kock, Anderson Giron, Crisbel Gutierrez, Isabella Consuegra, Jeaengelly Niles, Maria Jose Saa Carvajal y Annemarie Tromp (3e klas).

Atraves di nan arte, nan a expresa nan talento y amor pa mascota. Pabien na cada un di nos artistanan!

E presidente di e comision di accion ta contento di por a bolbe conta cu e sosten di Special Projects di Ministerio di Asuntonan Social y Laboral, cu ta tras di e diseño di e formulario di informacion y participacion di e concurso e aña aki como tambe esun di aña pasa.

Prome cu a ricibi nan regalo, tur mucha presente a haya un medaya di Ban Cultiva di Special Projects. Asina huntu ta yuda conscientisa tocante Ley di Cacho, y alabes ta sigui cultiva e talento di pintamento den nos muchanan.

Pa un grupo di 16 mucha cu no a cumpli cu tur exigencia pa ta den e finalistanan, pero cu na un of otro manera nan arte toch a resalta, e comision tin un premio chikito ainda, y lo tuma contacto cu nan e siman aki.

E comision kier gradici tur cu na un forma of otro a aporta pa haci e dia aki uno sumamente special pa nos muchanan, sin laga “Angel” afo (embahador di conscientisacion canino di Aruba), y un danki special ta bay na tur e scolnan cu a participa activamente, y tambe na e mayornan cu a percura pa nan yiunan participa.