Home » E Profesionalnan den sector di Enseñansa tambe lo traha a base di e Codigo di Proteccion den caso di abuso di mucha

E Profesionalnan den sector di Enseñansa tambe lo traha a base di e Codigo di Proteccion den caso di abuso di mucha

by Admin
0 comment 69 views

 

Oranjestad – Aruba: E fundeshi pa yega na e meta di Sociaal Crisis Plan pa mehora e sistema nacional di proteccion di mucha ta e Codigo di Proteccion, cu lo ta ancra den Ley y ta implementa den e sectornan; Enseñansa, Husticia, Social y Salubridad publico. E preparacionnan den cuadro di e trayecto di implementacion di e Codigo di Proteccion den Enseñansa ta tumando luga desde luna di september 2020.

 

Departamento di Enseñansa (DEA) conhuntamente cu Departamento di Inspeccion di Enseñansa (DIE) tin como meta pa logra yega na tur e “stakeholdersnan” importante den sector di Enseñansa, pa asina implementa e Codigo di Proteccion debidamente. Cu e Codigo di Proteccion den sector di Enseñansa, cada maestro y maestra lo yuda aporta na señala y maneha e casonan di sospecho di abuso di mucha. Na momento cu tin un caso di sospecho di abuso di mucho na scol, lo bay atende cu esaki a base di e 5 pasonan rekeri, cu ta skirbi den e Ley di Codigo di Proteccion. 

 

“E balor di mas grandi cu e Codigo di Proteccion ta trece den enseñansa ta, cu e mucha y hoben lo haya su bos pa expresa y alabes wordo scucha door nos profesionalnan” – Julie-Ann Thode, Lider di Proyecto sector Enseñansa. 

 

E tarea principal pa e sector di enseñansa lo bira, un ahustacion di cada maneho existente riba e tematica aki den tur e scolnan. E ahustacion aki lo ta mas bien dirigi pa incorpora e 5 pasonan uniforme, cu ta describi den e ley di Codigo di Proteccion di Aruba. Den e proximo lunanan lo tuma luga diferente analisis, p’asina por delinea henter e proceso y structura dentro di enseñansa miho. Finalmente ta gradici tur partner y directiva di e scolnan na Aruba, pa brinda nan sosten y colaboracion, pa hunto cu e scolnan tambe yega na un implementacion exitoso di e Codigo di Proteccion, cu lo bay tin un gran balor di proteccion y siguridad pa tur nos mucha-, hoben- y profesionalnan den henter sector di enseñansa na Aruba.

 

Pa mas informacion tocante e Ley di Codigo di Proteccion por tuma contacto cu Coordinador Nacional di Proyecto sra. Sue Ann Lacle-Ras via email [email protected]

 

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio