Den e prome y di dos parti di fact check, nos a atende mas bien cu loke Prome Minister actual a declara despues a firma cu Hulanda. Manera nos a priminti, den e di tres parti aki, nos lo atende tambe cu sr. Mike Eman a base di su reaccion riba e acuerdo firma aki y kende awor ta pretende di ta e “salbador” di nos automia. Al final nos por considere como co-culpabel di e MEGA-TRAICION aki, danki na su “Good Politics”, pero “Bad Governance”. Den e articulo anterior nos a yame e “grondlegger” di e traicion cu a culmina riba Black Friday, 13 di november ultimo! Di un banda nos por bisa cu e ta “e arkitecto” di e MEGA-TRAICION, y sra. Croes e “realisador” di esaki!
Sr. Eman: Nos tin retonan grandi atrobe cu nos ta enfrenta, retonan economico, social y tambe estatal. Lucha pa un dia tin un status autonomo, cu ta wordo afecta pa e decision cu ta wordo tuma na momentonan aki. Ta haci dolor e posicion cu Hulanda a tuma den e periodo aki y cu nos no por a crea/desaroya un plan convincente pa Hulanda pa asina yega na un acuerdo cu Hulanda cu ta diferente.
FACT-CHECK 1: E autor intelectual, arkitecto y iniciador di e situacion actual ta e gobierno cu Mike Eman a lidera y a hinca nos den un debe astronomico. E gobierno actual a corona e trabou di entrega di nos autonomia.
FACT-CHECK 2: E periodo actual a wordo defini pa e pandemia, pero e pandemia SO no ta culpabel di e deterioro socio-economico. Gabinetenan Eman(2009-2017)no a percura pa crea un espacio financiero pa frenta e problemanan, “traha dam warda awa” pa cualkier situacion di calamidad! Alcontrario cu “orguyo” a hinca Aruba den un abismo y un situacion deplorabel financieramente, hibando na intervencion Hulandes pa medio di un KB na 2014 y introduccion di CAft.
Eman: Hulanda ta tuma un postura fuerte ora negocia, pero ta tene cuenta cu bo argumentonan. A logra tempo cu Hulanda kier a bin cu AmvRB y evita un Rijkswet mescos di Corsou. A convence Hulanda cu Aruba ya caba tin 30 aña di Status Aparte y experiencia grandi den maneha su asuntonan y cu nos Parlamento por haci e trabou importante aki pa medio di un ley (LAft) cu a institui CAFT.
FACT-CHECK 3: E unico accion cu sr. Eman a tuma e tempo ey, ta sinta bou palo cu un welga di hamber. Y e unico resultado tabata entrega parti di Aruba su autonomia, y mas tristo ta sin ningun tipo di ayudo financiero manera Corsou y St. Maarten si a logra na 10-10-10.
FACT-CHECK 4: Hulanda a compronde cu de facto Parlamento di Aruba a asumi e postura di “Stempelparlement” cu ta firma “bij het kruisje”y a ignora su deber di controla e gobierno.
Eman: Nos ta lamenta cu den full e proceso aki no ta tin e transparencia y sinceridad pa nos conciudadanonan, sea ambtenaar of den sector priva, companianan di utilidad, cu no sa unda nan ta para, pasobra gobernacion no ta duna informacion. 4 pa 5 mil ambtenaarnan a wordo bisa cu medidanan cu a wordo tuma ta te na final di aña.
Si bo no por splica cuanto hende tin na trabou cu ta cerca di gobierno y cuanto e gastonan ta, anto por comprende dicon no por convence esnan cu a entrega, cu cos a bira dificil. P’esey ta bay over na duna informacion no corecto y p’esey miles di persona ta biba den incertidumbre grandi.
FACT-CHECK 5: Gabinetenan Eman tabata “transparente” den su maneho?? Dicon anto a pasa e.o. e deal cu Citgo sin cu a duna e parlamentarionan e oportunidad pa studia e acuerdo debidamente. Esey ta yama “transparencia selectivo”, pasobra Parlamento nunca lo desaproba e acuerdo cu tambe ta uno strangulante.
FACT-CHECK 6: Gabinetenan Eman a briya den manipula cu cifra y presenta presupuestonan completamente ficticio. No lubida e expresion di e representante di Rekenkamer na Parlamento cu “si no haci nos cas limpi, otro lo bin haci esaki pa nos”! Y CAFt cu semper a papia di cifranan ficticio!
Eman: Di awor padilanti desicionnan no ta den man di e comunidad ni di Parlamento ni Gobierno. For di distancia ta dicidi, mientras cu Hulanda no sa dolornan real den pueblo. Ta politiconan cu ta drenta pueblo y ta wak e scuridad, ta nan sa cu tin cu subi onderstand, subi reparatietoeslag, schooltoelage.
Con of na kende nos ta pidi responsabilicion si bini cu un “salestax” cu pueblo no por paga? Ken nos por pidi pa cambia algo? Ken ta bay sinta na mesa den un dialogo social cu sindicatonan y discuti cambio den pension of den AZV of den cualkier ley laboral?
FACT-CHECK 7: Mike Eman tabata tin 8 aña pa mehora e situacion di nos pueblo, pero apesar di a cana rond den pueblo a prefera toch di endueda nos pueblo sin scucha nan dolor y sin misericordia. Esaki te na casi 90% di nos GDP, causando cu awe nos no tin un espacio financiero pa sobrevivi e periodo dificil cu nos ta aden awor.No lubida e rapport di ARA riba e proyecto “BO BARIO”, unda 1.3 biyon florin no por wordo hustifica!
FACT-CHECK 8: E prome responsabel ta sr. Mike Eman y su partido cu a permiti pa Hulanda interveni pa motibo di “MAL GOBERNACION na 2014 den e asina yama “Witte Donderdag-akkoord”!
Atrobe nos ta constata cu e manipulacion di e dirigentenan di e partidonan tradicional ta sigui. Pesey UPP ta bisa cu na 1986 nos a drenta un ERA NOBO na Aruba, unda mester a cuminsa for di “scratch”, loke nos por considera como e Reboot 1.0. Hopi a bin haci Aruba nan cas y a cosecha na bon of na mal manera di e desaroyo cu Aruba a experiencia, a base di trabou y sacrificio.
Awe nos ta na un cruzada atrobe, cu binimento di COVID-19 a acelara. Pa salba Aruba y su pueblo, nos mester un otro ERA nobo cu NORMAL NOBO tambe. Pesey nos ta kere cu ta e momento, despues di 35 aña, pa bin cu REBOOT 2.0, pa asina crea un Aruba “post-COVID-19”, cu lo nifica un ERA NOBO, di desaroyo real pa e pueblo den un forma balanza, unda e mannan di e politiconan ta mara y asina no permiti nos bay bek den un epoca colonial. REBOOT 2.0, lo percura pa nos por RECOBRA y RECUPERA nos Status Aparte atrobe den 3 aña!
Partido UPP
Booshi Wever
22 november 2020