Den entrevista cu parlamentario Robert Candelaria (AVP) a bin dilanti e situacion serio andando na momento cu polis tin cu actua durante control den trafico. Na e momentonan aki polis no por actua y duna multa na chauffeurnan cu ta coriendo auto sin seguro valido.
Candelaria ta amplia riba esaki:
E mecanismo di control pa pasa na cada seguro y verifica si e persona ta of no ta sigura riba e fecha di boet no ta funcionando.
Den su posicion como parlamentario, Robert Candelaria personalmente kier y sa con pa lidera e proceso ey. Di su banda el a acerca Ministerio Publico, Asociacion di Seguro, Cuerpo Policial y Belasting Dienst y forma un “werkgroup” bou guia di Ministerio Publico pa traha un Database y for di akinan compila tur informacion di tur compania di seguro (up to date) pa nan ta fresco y asina tin e informacion di ken ta sigura y ken no.
E instrumento ey, Cuerpo policial ta e unico cu por haya acceso na e database aki y drenta wak si tal persona ta sigura (cerca ken y ki fecha). Na momento cu e proceso aki a cuminsa cana su caminda, a verifica cu Corte y di nan banda a reconoce cu ta suficiente prueba cu e boet por bay door of no. Tur procedura tabata bayendo riba e bon caminda pa concretisa esaki.
Minister Andin Bikker a haya tende di e iniciativa aki, cu ta cay bou di su cartera, cual e por tum’e over y cana cu ne. Candelaria di su banda a remarca, cu e colaboracion aki no ta algo pa su persona haya elogio cu ne, pero ta mira cu ta algo cu polis riba caya, cu ta autoridad, mester di dje como instrumento pa haci nan trabou. Na momento cu nan duna un procesverbaal, esaki ta ley y tin cu bay door
Candelaria a laga nan cana cu e iniciativa y a pidi pa e bay door, pa no lag’e para. COVIDa presenta, e Minister su hendenan a tuma e proyecto over y awo a mata e proyecto. Companianan di seguro no ta riba mesun liña mas, mientras algun compania di seguro a bisa di lo bay introduci nan propio app cu un QRcode caminda polis por verifica si nan ta sigura y cerca nan.
E intencion cu polis lo tabata tin un instrumento pa verifica ken ta segura of ken no, Minister y su hendenan a laga esaki bay. Y ainda e tabata tin e curashi di broma cu el a presenta un proyecto piloto pa companianan cu lo bin cu nan propio app. Pa resumi, e no a logra nada y a mata un proyecto cu tabata necesario pa polis.
Anhelo politico pa por “score” ta mata proyectonan y pone cu ta sacrifica instrumentonan necesario pa polis, con tal cu e haya elogio pa algo cu e no a haci ni logra. Lamentabel y ta recurente den escogencianan robes cu e mandatario aki a bin ta haci pa mas di tres aña caba den “maneho” den husticia.