Home Corte Psycologo cu a mishi cu mucha homber  condena na 18 luna di prison

Psycologo cu a mishi cu mucha homber  condena na 18 luna di prison

SHARE

ORANJESTAD – Hues di Corte den Promer Instancia awe mainta a dicta sentencia den e caso penal cu Ministerio Publico a cuminsa contra e homber C.(54). E sentencia a sosode den sala di Corte di Aruba pero via video conference.

   Aruba Native por a compronde cu Hues a confirma e exigencia di Fiscal cu ta 24 luna di prison di cual 6 luna ta condicional cu un tempo di prueba di 3 aña.

   Tratamento di e caso aki a sosode luna pasa caminda Fiscal a bisa cu a keda legalmente proba cu e homber C., kende ta un psycologo, a masturba e mucha homber di 15 aña, kende tabata drumi riba su cama. Fiscal a tuma C. na malo cu e ta desmenti y no ta tuma responsabilidad pa loke el a haci. Fiscal a mustra cu tin prueba di sosten. E ta mustra riba e promer declaracion di e homber J. cu tambe tabata na e cas, kende a bisa cu el a mira con C. a hinca rudia dilanti e mama di e mucha y a pidi sorry. Tambe por mustra cu C. ta bisa cu el a bay busca whipes pa e mucha limpia su curpa. Fiscal a cuestiona e declaracion di J., haci despues di algun luna, na Hues Comisario. Despues di a papia 5 biaha cu e sospechoso, ta duna un declaracion diferente. Fiscal tambe, mescos cu Hues, ta haya straño con J. ta duna declaracion diferente. Fiscal a bisa cu no por confia e ultimo declaracion di J. Fiscal ta haya cu tin prueba convicente cu C. a mishi cu e mucha. Fiscal a exigi 24 luna di prison di cual 6 luna condicional cu 3 aña di prueba. Fiscal a bisa cu tin daño pero ta dificil pa bisa cuanto esaki ta. Pa loke ta e demanda, el pidi pa aproba 5 mil florin y si e mama ta desea por cuminsa un caso civil pa e resto.

   Hues awe mainta a bisa cu e ta haya legalmente proba cu dia 15 Mei 2020, C. a masturba e mucha te ora e mucha a bin cla. Hues ta haya cu tin suficiente prueba di sosten. El a mustra cu e mama di e mucha mes a declara cu C. a pidi sorry y pa laga e cos keda entre nan dos. Tin declaracion di J. cu el a mira con C. a bay na rudia y pidi sorry. Na opinion di Hues, no tin motibo di duda den e declaracionnan aki. Hues a remarca cu despues di algun luna, J. a duna otro declaracion na Hues Comisario caminda e ta bisa cu e no ta corda cu C. a pidi sorry. Awor e ta bisa cu el a mira tur cos cu a pasa siendo cu anterior el a bisa cu e no a mira nada. Hues no ta confia e declaracion aki. El a mustra cu promer cu J. a duna e declaracion aki, J. a bay bishita C. 5 biaha na KIA.

   Pa loke ta e castigo, Hues a tene cuenta cu ta un caso serio. El a bisa cu muchanan por keda afecta. C. a abusa di e confianza cu e mama y e mucha tabatin den dje. Riba dje C. ta un psycologo y mester sa mihor. Hues a tene cuenta tambe cu ningun momento C. a realisa cu el a haci algo malo. Hues a confirma e exigencia di Fiscal y a condena C. na 24 luna di prison di cual 6 luna ta condicional y un tempo di prueba di 3 aña.